Toshkent viloyatidagi ishlab chiqarish sexi omborxonasida yong‘in sodir bo‘ldi

2019 yilning 13 sentabr kuni soat 13:44 da Toshkent viloyati Yuqorichirchiq tumani Mirobod MFY Charog‘on ko‘chasida joylashgan “THE BEST PRODUKT” MChJga qarashli to‘shak ishlab chiqarish sexida yong‘in bo‘layotganligi haqida yong‘in-qutqaruv qismiga xabar kelib tushgan.

O‘zbekiston Respublikasi FVV YoXBB OAV bilan hamkorlik qilish bo‘linmasi ma'lumotiga ko‘ra, xabar asosida voqea joyiga 6 ta yong‘in o‘chirish avtoekipajlari jalb etilgan. Chaqirilgan manzilga birinchi bo‘linmalar soat 14:05 da yetib borgan va ko‘rilgan tezkor harakatlar natijasida yong‘in soat 14:15 da qurshab olinib, soat 14:30 da to‘liq bartaraf etilgan. 

Tan jarohati olganlar va halok bo‘lganlar yo‘q. Yong‘in oqibatida sex omborxonasining 80 kv. metr maydonda shifti va ichki qismidagi eski mato chiqindilari yongan. Yong‘indan omborxonaning 360 kv. metr maydoni saqlab qolingan. Yong‘inning taxminiy sababi - elektr simlarining qisqa tutashuvi. Moddiy zarar miqdori aniqlanmoqda.