«O‘zarxiv» agentligining asosiy vazifalari belgilab beriladi

Vazirlar Mahkamasining “O‘zbekiston Respublikasi “O‘zarxiv” agentligi to‘g‘risidagi nizomni tasdiqlash haqida”gi qarori loyihasi e'lon qilindi.

Agentlik arxiv ishi va ish yuritish sohasida yagona siyosat olib boruvchi davlat boshqaruvi organi hisoblanadi hamda o‘z faoliyatida O‘zbekiston Respublikasi Vazirlar Mahkamasiga bo‘ysunadi.

Agentlik tizimiga quyidagilar kiradi:

Agentlik markaziy apparati;

Qoraqalpog‘iston Respublikasi, viloyatlar va Toshkent shahar arxiv ishi hududiy boshqarmalari;

O‘zbekiston Milliy arxivi;

O‘zbekiston Kinofotofono hujjatlari milliy arxivi;

O‘zbekiston Ilmiy-texnika va tibbiyot hujjatlari milliy arxivi;

Qoraqalpog‘iston markaziy davlat arxivi, Toshkent shahar markaziy davlat arxivi, viloyat, shahar va tuman davlat arxivlari va ularning filiallari, shaxsiy tarkib hujjatlari davlat arxivlari;

Arxiv ishi va ish yuritish bo‘yicha malaka oshirish ilmiy-metodik markazi.

Hududiy boshqarmalar Agentlikka, Qoraqalpog‘iston Respublikasi Vazirlar Kengashi, viloyat va Toshkent shahar hokimliklariga hisob beradi.

Davlat arxivlari Agentlikning hududiy boshqarmalari va tegishli tumanlar (shaharlar) hokimliklariga hisob beradi.

O‘zbekiston Milliy arxivi, O‘zbekiston Kinofotofono hujjatlari milliy arxivi, O‘zbekiston Ilmiy-texnika va tibbiyot hujjatlari milliy arxivi, Markaz Agentlikka hisob beradi.

Quyidagilar Agentlikning asosiy vazifalari hisoblanadi:

arxiv ishi va ish yuritish sohasida yagona davlat siyosatini yuritish va nazoratini amalga oshirish;

Milliy arxiv fondi hujjatlarini jamlash, ularning saqlanishini, davlat hisobiga olinishini ta'minlash va ulardan keng foydalanish;

hududiy boshqarmalarni, milliy arxivlar va davlat arxivlarini boshqarish va ularning samarali faoliyat ko‘rsatishini ta'minlash;

arxiv xizmatlarini ko‘rsatishda nodavlat sektorini yanada rivojlantirish, arxiv ishi sohasida davlat-xususiy sheriklik uchun qulay shart-sharoitlar yaratish;

arxivshunoslik, arxeografiya, ish yuritish, elektron hujjat aylanishi sohasida ilmiy, metodik ishlarni tashkil etish va muvofiqlashtirish, ilmiy tadqiqotlar natijalarini va ilmiy-texnika yutuqlarini respublika arxivlari amaliyotiga joriy etish;

zamonaviy texnologiyalaridan foydalangan holda muntazam ravishda arxiv ishi va ish yuritish sohasida faoliyat ko‘rsatayotgan xodimlarni malakasini oshirish tizimini shakllantirish;

arxiv ishi va ish yuritish sohasidagi mamlakatimiz va xorijiy davlatlarning ilg‘or ish tajribasini o‘rganish va ommalashtirish, xorijiy arxivlarda saqlanayotgan O‘zbekiston tarixiga oid arxiv hujjatlari nusxalarini olib kelish.

Agentlik o‘ziga yuklatilgan vazifalarni va funksiyalarni bajarishda quyidagi huquqlarga ega:

O‘zbekiston Respublikasi Vazirlar Mahkamasiga yoki O‘zbekiston Respublikasi Prezidenti Administratsiyasiga normativ-huquqiy hujjatlar loyihalarini, shuningdek, Agentlikka yuklangan vazifalar va funksiyalarni bajarish bilan bog‘liq bo‘lgan boshqa hujjatlarni belgilangan tartibda kiritish;

vazirlik va idoralar, mahalliy ijro etuvchi hokimiyat organlari, tashkilotlar, mansabdor shaxslar va fuqarolar tomonidan bajarilishi majburiy bo‘lgan normativ-huquqiy hujjatlarni qabul qilish, zarur hollarda, boshqa vazirlik va idoralar bilan birgalikda qo‘shma qarorlar va boshqa hujjatlar qabul qilish;

Agentlikning vakolatiga kiruvchi masalalarda davlat va xo‘jalik boshqaruvi organlari, mahalliy ijro etuvchi hokimiyat organlarining faoliyatini muvofiqlashtirish;

davlat va xo‘jalik boshqaruvi organlari, mahalliy ijro etuvchi hokimiyat organlaridan Agentlik vakolatiga tegishli masalalarni hal qilish uchun zarur bo‘lgan axborotni belgilangan tartibda so‘rash va olish;

Agentlikning vakolatiga kiruvchi masalalarda sudlarga davlat boji to‘lamasdan arizalar va da'volarni kiritish;

vazirliklar, idoralar, tarmoqlararo davlat jamg‘armalari va MAFning hujjatlarini doimiy saqlashni amalga oshiruvchi tashkilotlarning sohaga doir faoliyatini muvofiqlashtirish;

Agentlikning vakolatiga tegishli masalalar bo‘yicha zarur ma'lumotlarni davlat statistika organlari, davlat soliq xizmatlari organlari, davlat xizmatlari markazi va boshqa vazirlik va idoralardan bepul olish;

Agentlik va uning tarkibiy tuzilmasidagi hududiy boshqarmalari va davlat arxivlarining davlat mulkini, o‘zining tashkiliy tuzilmasi doirasida belgilangan tartibda bir bo‘linmadan boshqasiga bepul o‘tkazish;

Agentlik xodimlari va uning hududiy boshqarmalari va davlat arxivlari tomonidan arxiv ishini rivojlantirishning asosiy ko‘rsatkichlari parametrlari bajarilishini hisobga olgan holda moddiy rag‘batlantirish tartibini, miqdorini va shartlarini belgilash;

Agentlik vakolatlariga kiruvchi masalalar bo‘yicha takliflarni ko‘rib chiqish uchun O‘zbekiston Respublikasi Prezidenti Administratsiyasiga, Vazirlar Mahkamasiga, davlat va xo‘jalik boshqaruvi organlariga, mahalliy ijro etuvchi hokimiyat organlariga kiritish;

arxiv ishi va ish yuritish sohasida xalqaro shartnomalar va idoralararo bitimlarni belgilangan tartibda tuzish, xalqaro, hukumatlararo bitimlar loyihalarini taqdim etish;

arxiv ishi va ish yuritish sohasida O‘zbekiston Respublikasi manfaatlarini belgilangan tartibda xalqaro miqyosda himoya qilish;

o‘z vakolatlari doirasida yuridik va jismoniy shaxslar uchun arxiv ishi va ish yuritish sohasida majburiy bo‘lgan me'yoriy-huquqiy hujjatlarni ishlab chiqish va qabul qilish;

davlat hokimiyati va boshqaruvi organlari vakillari, tarmoq davlat fondlari, respublika muzeylari va kutubxonalarining qo‘lyozmalar bo‘limlarining idoraviy saqlash bosqichidagi arxiv hujjatlari saqlanishining holati va ish yuritish tashkil etilishi to‘g‘risidagi hisobotlarni eshitish, Agentlik vakolatiga doir masalalar bo‘yicha axborotlarni belgilangan tartibda so‘rab olish;

O‘zbekiston Respublikasi Milliy arxiv fondi hujjatlarini doimiy saqlovchi respublika davlat arxivlari, tarmoq davlat fondlari, vazirliklar, davlat qo‘mitalari, idoralar, tashkilotlar, kutubxonalar va muzeylarning qo‘lyozmalar bo‘limlari, nodavlat notijorat tashkilotlar, shu jumladan, siyosiy partiyalar, diniy tashkilotlar, boshqa yuridik shaxslardan, shuningdek fuqarolardan MAFning Davlat katalogi uchun tegishli ma'lumotlarni olish;

respublika davlat hokimiyati va boshqaruvi organlaridan hamda idoraviy bo‘ysunishidan qat'i nazar, tashkilotlardan arxiv ishi va ish yuritishning holati to‘g‘risida zarur ma'lumotlarni olish;

mansabdor shaxslarning MAF hujjatlarining o‘g‘irlanishi, yaroqsiz holga keltirilishi, yashirilishi, yo‘qotilishi yoki noqonuniy yo‘q qilinishiga olib kelgan shart-sharoitlar to‘g‘risida huquq-tartibot organlariga xabar qilish;

arxiv ishi va ish yuritish masalalarini ko‘rib chiqish uchun doimiy va vaqtincha idoralararo komissiyalar, kengashlar tashkil etish;

arxiv ishini va ish yuritishni hujjatlarni tashkil qilish sohasida respublika vazirliklari, idoralari va tashkilotlari tomonidan ishlab chiqilgan qoidalar, nizomlar, ko‘rsatmalar, o‘quv dasturlari va boshqa hujjatlarni kelishish;

o‘z vakolati doirasida arxiv ishi va ish yuritish sohalarida xalqaro tashkilotlar bilan, shuningdek mansabdor shaxslar va fuqarolar bilan o‘zaro hamkorlik qilish;

arxiv ishi, hujjatshunoslik va arxeografiya sohalarida ilmiy-tadqiqot va boshqa ishlar uchun tanlov e'lon qilish;

o‘z xizmat vazifalarini bajarish uchun Agentlikning mansabdor shaxslari belgilangan tartibda arxivlar, idoraviy arxivlar, davlat organlari, davlat va xo‘jalik boshqaruvi organlarining ish yuritish xizmatlariga, shuningdek tashkilotlarga kirish;

O‘zbekiston Milliy arxivining davriy nashrlari saqlovxonasiga tarixiy ilmiy nashrlar va davriy nashrlar nazorat nusxalarini olish;

Agentlik arxiv hujjatlarini saqlanishini yaxshilash maqsadida o‘z vakolatlari doirasida davlat arxivlarini binolarini va qo‘shimcha saqlovxonalarini qurish, rekonstruksiya qilish, moddiy texnika bazasini mustahkamlash ishlarini qo‘shimcha moliyalashtirish, moliyaviy-xo‘jalik faoliyatini tekshirish hamda ular orasida bino yoki inshootlarni, asosiy vositalarni o‘tkazish, taqsimlash yoki qayta taqsimlash ishlarini amalga oshirish;

Agentlik vakolati doirasida tashkilotlarni tugatish komissiyasi faoliyatida ishtirok etish;

davlat arxivlarida MAF hujjatlarini yo‘qolganligi, nobud bo‘lganligi, shikast yetkazilganligida ularni Markaziy Ekspert Tekshiruv Komissiyasi qaroriga ko‘ra davlat hisobidan chiqarishni tashkil qilish.