O‘zbekiston Afg‘onistonga gumanitar yordam yetkazib berdi

O‘zbekiston «Tinchlik uchun» xayriya aksiyasi doirasida yig‘ilgan gumanitar yordamni Afg‘onistonning Mozori-Sharif shahriga yetkazib berdi. 

«O‘zbekiston temir yo‘llari» aksiyadorlik jamiyati xabariga ko‘ra, mazkur xayriya aksiyasi O‘zbekiston yoshlari umumjahon assotsiatsiyasi tomonidan Afg‘oniston Islom Respublikasida yashovchi yoshlarni qo‘llab-quvvatlash maqsadida joriy yilning 1 sentyabridan 1 oktyabriga qadar bo‘lgan muddatda amalga oshirildi. 

Undan kelib tushgan barcha mablag‘lar yoshlar uchun zarur bo‘lgan kitob (badiiy adabiyot), o‘quv-qurollar, kiyim-kechak va sport anjomlarini xarid qilish uchun sarflanadi. 

Qayd etilishicha, bularning barchasi Afg‘onistondagi ota-ona qaramog‘isiz qolgan, og‘ir sharoitlarda yashayotgan etnik o‘zbeklar va afg‘on yoshlarining muammolariga keng jamoatchilik e'tiborini qaratish hamda ularni qo‘llab-quvvatlashga yo‘naltirilgan bo‘lib, «O‘zbekiston temir yo‘llari» AJ tomonidan qo‘shni davlatga poyezd va yuk mashinalarida yetkazib berildi.