«O‘zgidromet» hafta davomida qanday ob-havo kutilayotganini ma'lum qildi

Bugun O‘zbekiston bo‘yicha quruq va 3-8 daraja haroratli iliq havo saqlanib turadi. Ertaga respublika hududida ob-havo barqaror bo‘lib harorat 10-13 daraja iliqqacha ko‘tarilishda davom etadi va shu kunning me'yoridan 2-4 darajaga yuqori bo‘ladi.

«O‘zgidromet»ning yozishicha, chorshanba kuni mamlakat hududining katta qismida ob-havoning o‘zgarishi kutilmoqda ayrim joylarda yog‘gan yomg‘ir qorga aylanishi mumkin. Bu Turkmaniston tumanlaridan nam havo oqimlari kirishi bilan bog‘liq. Respublikaning ayrim joylarida shamolning tezligi sekundiga 15-20 metrgacha kuchayishi mumkin. Faqat Qoraqalpog‘istonda, Xorazm, Andijon, Namangan va Farg‘ona viloyatlarida yog‘ingarchilik bo‘lmaydi. Harorat kechasi 0-5 daraja iliqni tashkil qiladi, kunduzi 3-8 daraja iliqqacha pasayadi va me'yordan 4-6 daraja past bo‘ladi.

Payshanba (19 dekabr) kuni Qoraqalpog‘iston, Xorazm, Toshkent, Samarqand, Jizzax, Sirdaryo, Andijon, Namangan, Farg‘ona viloyatlarida mamlakat hududiga Volga bo‘yidan kirayotgan sovuq havo fronti ta'sirida kuchsiz yog‘ingarchilik kuzatilishi mumkin. Respublikaning qolgan hududida yog‘ingarchilik bo‘lmaydi, harorat shu chegarada saqlanib qoladi.