Jazirama ortidan salqinlik?

Respublikaga kirib keladigan nisbatan salqin ob-havo jazirama kunlar bilan o‘rin almashadi. Ushbu salqinlik qishloq xo‘jaligi uchun qulay sharoit yaratishi kutilmoqda. Biroq shamollar, tog‘larda yog‘adigan jala va baland yaylovlardagi salqinlik bog‘bonlar va chorvadorlardan ehtiyotkorlikni talab etadi.

Hafta davomida kutilayotgan ob-havo bilan iqlimshunos Erkin Abdulahatov tanishtiradi.

Joriy hafta qishloq xo‘jaligi uchun nisbatan qulay bo‘lishi kutilmoqda. Seshanbadan boshlab hududlarning katta qismida harorat pasayib, ekinlardagi stress biroz yumshaydi. G‘o‘za, sabzavot-poliz va bog‘dorchilik ekinlarining kunduzgi fiziologik faoliyati uchun nisbatan qulay sharoit yuzaga keladi hamda sug‘orishdan keyingi namlikning saqlanish muddati biroz uzayishi mumkin.

Biroq hafta boshida kuzatilishi kutilayotgan kuchli shamollar ayrim hududlarda tuproqning tez qurishi, yosh ko‘chatlar shikastlanishi hamda chang ko‘tarilishiga sabab bo‘lishi mumkin. Shu bois dehqonlar imkoni boricha kimyoviy ishlovni va barg orqali oziqlantirish tadbirlarini shamolli kunlarga mo‘ljallamasliklari kerak bo‘ladi.

Tog‘ va tog‘oldi hududlarda esa hafta davomida qisqa muddatli jala kuzatilishi mumkin. Ayrim joylarda sel xavfi yuzaga kelishi ehtimoli mavjud bo‘lgani bois, tog‘ yonbag‘irlaridagi ekin maydonlarida, bog‘lar va infratuzilma obektlarida ehtiyotkorlik choralarini kuchaytirish maqsadga muvofiqdir.

Chorvadorlar uchun

Hafta o‘rtasidan boshlab baland tog‘li yaylovlarda havo harorati sezilarli pasayib, tun va ertalabki soatlar sezilarli salqin bo‘lishi, ayrim joylarda hatto sovuq tushishi mumkin. Shu bois cho‘ponlar yomg‘ir va shamoldan himoya qiluvchi kiyim-boshlarini, vaqtinchalik boshpanalarini tayyor tutishlari hamda yosh qo‘zichoqlarni sovuqdan asrash choralarini oldindan ko‘rishlari tavsiya etiladi. Shuningdek, momaqaldiroqli yog‘inlar vaqtida mollarni tog‘ cho‘qqilari va ochiq balandliklarda uzoq ushlab turmaslik maqsadga muvofiqdir.

Haftaning ikkinchi yarmida shakllanadigan nisbatan salqin ob-havo yozning avvalgi haftalarida kuzatilgan kuchli issiqlik ta’sirini ma’lum darajada yumshatib, qishloq xo‘jaligi ishlarini bajarish uchun ancha qulay sharoit yaratishi kutilmoqda.