Rossiyada bankomatni portlatmoqchi bo‘lgan 4 nafar o‘zbekistonlik sudlandi

Rossiyaning Perm shahri Motovilixin tuman sudi 3,4 mln rubldan ko‘proq pul o‘g‘irlash maqsadida bankomatni ochmoqchi bo‘lgan 4 nafar o‘zbekistonlikka qarshi jinoiy ish bo‘yicha hukm chiqardi.

Foto: Pixabay

Perm o‘lkasi prokuraturasida ma'lum qilinishicha, jinoyatchilar Permdagi bankomatlar ichidagi pullarni qo‘lbola portlovchi qurilma qo‘llagan holda qo‘lga kiritishmoqchi bo‘lishgan. Biroq ular jinoyatni oxirigacha yetkaza olishmagan: jinoyatchilar qo‘lga tushishdan qo‘rqib, voqea joyidan qochib qolishgan. Keyinroq politsiya ularni ushlashga muvaffaq bo‘lgan.

4 nafar erkakka o‘ta katta miqdorda o‘g‘irlik sodir etish, portlovchi qurilmalarni, saqlash, olib yurish va tashish, tayyorlash moddalari bo‘yicha ayblov e'lon qilingan. Sud o‘zbekistonliklarga 5 yildan 7 yilgacha ozodlikdan mahrum etish va 300 mingdan 350 ming rublgacha jarima to‘lash jazosini tayinlagan.