Odam savdosi bilan shug‘ullanuvchi ikki shaxs to‘rt nafar «o‘ljasi» bilan qo‘lga olindi

Toshkent viloyati IIBB Odam savdosi va noqonuniy migratsiyaga qarshi kurashish tezkor xodimlari tomonidan 2020 yilning 10 fevral kuni tezkor tadbirlar o‘tkazilgan.

Natijada, Moskvada yaxshi maosh to‘lanadigan ish topib berishni va'da qilib, hatto yo‘l xarajatlarini o‘z hisobidan qoplagan holda olib ketishni aytib, ularni fohishalik bilan shug‘ullantirishni maqsad qilgan, “Dilafruz” va “Umida” 19-25 yosh oralig‘idagi turli viloyatlardan bo‘lgan 4 nafar ayol-qizlarni, Namangan xalqaro aeroportidan “Namangan-Moskva” aviareysi orqali Moskva shahriga olib ketayotgan vaqtida ushlangan.

Toshkent viloyati IIBB tezkor xodimlariga Nurafshon shahrida o‘zini “Dilafruz” va “Umida” (shartli ismlar) deb tanishtiruvchi shaxslar, qizlarni yaxshi daromad orttirish bilan qiziqtirib aldov yo‘li bilan Rossiya Federatsiyasiga olib ketishni rejalashtirganligi ma'lum bo‘ladi. 

O‘tkazilgan surishtiruv davomida o‘zini “Dilafruz” deb tanishtirgan shaxs – Namangan viloyati Kosonsoy tumanida yashovchi 1981 yilda R.M., sherigi “Umida” – Namangan viloyati Pop tumanida yashovchi 1987 yilda tug‘ilgan U.N. ekanligi aniqlanadi.

Shuningdek, tadbir davomida U.N. o‘zi ishlab kelayotgan ayollar go‘zallik saloniga kelgan yosh va ko‘rinishi chiroyli qizlarni yaxshi daromad orttirish bilan qiziqtirib, R.M. bilan tanishtirib kelganligi va buning evaziga undan o‘z ulushini olib kelganligi, R.M. esa 2019 yildan buyon Moskva shahrida olib borilgan qizlarga, internet ijtimoiy tarmoqlari orqali jinsiy aloqa qilishlari uchun mijoz topish bilan shug‘ullanib, moddiy daromad orttirib kelayotganligi aniqlangan.

Hozirda mazkur holat yuzasidan Ichki ishlar bosh boshqarmasi tomonidan tergov oldi surishtiruv ishlari olib borilmoqda.