Фото: REUTERS

Пентагон раҳбари Марк Эспер “Толибон” билан имзоланган келишувга кўра, АҚШ қўшинларининг Афғонистондан олиб чиқилиши 10 кундан кейин бошланишини маълум қилди. Келишувда 135 кун ичида ҳарбийлар сонини 8600 нафаргача камайтириш кўзда тутилган. 

Эспер, моҳиятан, шу баёноти билан АҚШ президенти Дональд Трампнинг қўшинлар Афғонистонни 29 февралдан бошлаб тарк этиши ҳақида аввалроқ айтган сўзларини инкор этган.  

Пентагон раҳбари қўшинлар айнан қачон олиб чиқила бошланиши ҳақидаги саволга бу унга номаълумлигини, бироқ у АҚШ қуролли кучлари штаблари бошлиқлари қўмитаси раиси генерал Марк Миллига 10 кун ичида бу йўналишда ҳаракатланишни бошлашга рухсат берганини айтган.

Эспернинг таъкидлашича, АҚШ Афғонистонда ИШИДга қарши амалиётни давом эттирмоқда. 

29 февралда доҳада АҚШ ва “Толибон” ўртасида имзоланган тинчлик келишувига кўра, АҚШ, унинг иттифоқдошлари ва коалиция 14 ой ичида Афғонистондан барча қўшинларини олиб чиқмоқчи. Келишув имзолангандан 4,5 ой ичида АҚШ қўшинлари сони 8,6 минг нафаргача қисқартирилиши керак. Шунга мутаносиб равишда коалиция ва иттифоқдошлар қўшинлари ҳам камайтирилади. Сўнгра толиблар барча мажбуриятларни бажарса, қолган 9,5 ой ичида Афғонистондан қолган барча кучлар ҳам олиб чиқиб кетилади.