11:55 / 04.03.2020
0
2025
Ғоялар фабрикаси. 550 нафар делегатни бирлаштирган форумда нималар муҳокама қилинди?

Жаҳон иқтисодиёти ва бизнес халқаро форуми Ўзбекистон ва Марказий Осиё мамлакатларидан иштирок этган 550  нафар ёш иқтисодчилар, иқтидорли ёшлар ва тадбиркорларни бир платформада жамлаган, Ўзбекистонда илк маротаба ўтказилган йирик форматдаги анжумандир. Дунёдаги глобал ижтимоий иқтисодий муаммоларга ёшларнинг ўз билим ва салоҳиятларидан келиб чиқиб eчимларини тақдим қилишлари учун имконият яратган катта майдон.

Конференцияда муваффақиятли иштирок этган 25 нафар ёш иқтисодчи кейинги босқичдаги "Республика ёш аналитиклар” клуби аъзосига айланди. Бу клубда Ўзбекистон ва жаҳонда содир бўлаётган иқтисодий ўзгаришлар таҳлил қилиб борилади ҳамда мустақил илмий ишлар билан шуғулланилади. 

Бутун дунё бўйича ушбу тартибдаги юзлаб анжуманлар ташкил қилиниб, уларда иштирок этадиган ёшлар турли мавзулар асосида дебатлар олиб бориб, ғоялар ишлаб чиқишади. С7-WEB лойиҳаси бутун дунё миқёсида ташкил этилaдиган тадбирлардан нимаси билан фарқ қилади, деган табиий савол туғилади. Демак, лойиҳа мақсади ҳақида қисқача тўхталиб ўтамиз.

Бугунги кунда жаҳон иқтисодиётида етакчи вазифани бажариб келаётган еттита ташкилот симуляцияси асосида ташкиллаштирилгани сабабли С7 Жаҳон иқтисодиёти ва бизнес номини олди. Ёшларни мазкур ташкилотлар фаолияти билан яқиндан таништириб, бугунги глобал иқтисодий ва ижтимоий муаммоларга республиканинг ёш иқтисодчи ва талабалари нуқтаи-назаридан келиб чиққан ҳолда илмий асосланган ва креатив ечимлар тақдим қилиш.

Форум орқали Ўзбекистоннинг барча ҳудудларидан ёш иқтисодчи талабаларни бир платформа атрофида жамлаб, конференция жараёнида "Peer to peer" яъни "Ёшлар-ёшларга” тамойили асос бўлди. Симуляция қилинган ташкилотлар UN ECOSO (Бирлашган миллатлар ташкилоти Ижтимоий-маcалалар бўйича қўмитаси) EU (Европа Иттифоқи) SCO  (Шанҳай ҳамкорлик ташкилоти) World Bank (Жаҳон Банки) WTO (Бутунжаҳон савдо ташкилоти)  UNWTO (Бутунжаҳон туризм ташкилоти) бўлиб, ҳар бир делегат гуруҳларга бўлиниб глобал муаммони танлаб олади ва уни бутун дунё давлатлари мисолида ўрганиб чиқиб, 2 дақиқа ичида муаммонинг камчилик ҳамда ютуқ тарафларига ечим берилади.

Олиб борилаётган дебатларнинг барчаси инглиз, рус тилларидa. Ёшларнинг  жаҳон тиллари ҳисобланмиш инглиз тилида ўз она тилларида сўзлашгандек фикрларини эркин баён этиш кўрсатгичи ошиб бораётганини анжуман қатнашчиларининг равон нутқи, теран фикридан англаш мумкин. Форумда Афғонистон, Қозоғистон, Қирғизистон, Тожикистон, Арманистон, Индонезия, Малайзиядан ҳам ёш делегатлар иштирок этди. Ёшларнинг илғорлиги ва жаҳонда юз бераётган муаммоларни ҳам иқтисодий, ҳам сиёсий эркин таҳлил қилишларини кўриб,  муҳит ва фикрлар aлмашинувидан ушбу анжуманни катта бир фабрикага таққослаш мумкин.

Илк маротаба ташкил этилган ёшларнинг йирик анжуманидан келажакда давлат имижини шакллантиришда, иқтисодий ва сиёсий ўзгаришларда кутилаётган натижалар кўп ва самарали бўлишига мен форум кузатувчиси ва халқаро эксперт сифатида ишонаман.

Нафосат Тожибоева

Ушбу хабарга фикрингизни билдиринг. Бунинг учун авторизациядан ўтишингиз керак!
Top