Saida Mirziyoyeva UNEP va GEF rahbariyati bilan uchrashdi

Muloqot chog‘ida cho‘llanish va yerlar degradatsiyasiga qarshi kurashish, havo sifati monitoringi va boshqa mavzular muhokama qilindi.

Foto: Telegram / Saida Mirziyoyeva

Prezident Administratsiyasi rahbari Saida Mirziyoyeva Samarqandda o‘tayotgan Global ekologik jamg‘arma Assambleyasi doirasida 5 iyun kuni BMT Bosh kotibi o‘rinbosari – UNEP ijrochi direktori Inger Andersen hamda Global ekologik jamg‘arma bosh ijrochi direktori Klod Gaskon bilan uchrashdi.

«Muloqot chog‘ida mintaqamiz uchun g‘oyat muhim bo‘lgan masalalar: cho‘llanish va yerlar degradatsiyasiga qarshi kurashish, havo sifati monitoringi, biologik xilma-xillikni asrash hamda resurslardan oqilona foydalanish mavzularini muhokama qildik.

UNEP va GEF rahbariyatiga mamlakatimizdagi «yashil» islohotlarni qo‘llab-quvvatlayotgani hamda amaliy ekologik yechimlarni ilgari surishga qo‘shayotgan hissalari uchun chuqur minnatdorlik bildirib, jamg‘armaning Samarqanddagi tarixiy Assambleyasi muvaffaqiyatli o‘tgani munosabati bilan tabriklayman», deb yozdi Saida Mirziyoyeva.