Erdo‘g‘an parlamentga tana haroratini o‘lchovchi teplovizorga ega yordamchi bilan keldi

Bu haqda NTV telekanali xabar berdi.  

Prezident yordamchisi Erdo‘g‘an atrofida bo‘lgan jurnalistlar va siyosatchilarning haroratini o‘lchagan.

Avvalroq Turkiyada koronavirusga chalinish bo‘yicha ilk holat qayd qilingani ma'lum qilingandi. Ta'kidlanishicha, virus yuqtirgan odam erkak kishi bo‘lib, u Yevropaga safardan yaqindagina qaytgan bo‘lgan. Erdo‘g‘anning o‘zi esa parlamentdagi nutqida infeksiya tarqalishi sababli qo‘l siqishishdan qochayotganini ma'lum qilgan.

Jumladan, Erdo‘g‘an 10 mart kuni Albaniya, Braziliya va Moldova elchilariga ishonch yorliqlarini topshirish vaqtida qo‘l siqishishni joiz topmagan. Shuningdek, Turkiya prezidenti Bryusselga tashrifi vaqtida NATO bosh kotibi Yyens Stoltenberg bilan qo‘l siqishishdan qochib, ko‘ksiga qo‘lini qo‘yish bilan kifoyalangan.