«O‘zbekiston temir yo‘llari» xodimlari taqdiri nima bo‘ladi?

«Hukumat qaroriga binoan, karantin davrida majburmiz, xodimlarimiz mehnat ta'tiliga chiqarilgan va oyligi saqlanmagan holatda o‘z xohishiga binoan ta'til olishgan. [Qolgan] xodimlarimiz masofadan ishlashga o‘tkazilgan.

Albatta, karantin tugagach, bu xodimlarimiz hammasi o‘z joylariga qaytib, ish faoliyatini davom ettiradi. Bu – vaqtincha chora», dedi Umidilla Ibragimov.

Uning qo‘shimcha qilishicha, «O‘zbekiston temir yo‘llari» temir yo‘l sohasida yetishib chiqayotgan kadrlarni ish bilan ta'minlashda davom etadi.

Eslatib o‘tamiz, avvalroq Oliy Majlis Qonunchilik palatasi deputati Rasul Kusherbayev mehnat qonunchiligiga zid ravishda xodimlarini haq to‘lanmaydigan ta'tilga chiqarayotgan tashkilotlarni tanqid ostiga olgandi.

«Ayrim idora va tashkilotlar xodimlarini shunday vaqtda qo‘llab-quvvatlash o‘rniga o‘z hisoblaridan majburan mehnat ta'tiliga chiqarib yubormoqda. Bunday holatni biz «O‘zbekiston temir yo‘llari» kompaniyasi xodimlari misolida ham ko‘ryapmiz. Bu – avvalo tashkilotning o‘z xodimlariga nisbatan nomardligi bo‘ladi», – degandi Rasul Kusherbayev Kun.uz muxbiri bilan suhbatda.