12:00 / 09.04.2020
14086
Ўзбекистонда 70 мингдан ортиқ киши коронавирусга тест топширган

Ўзбекистонда шу вақтгача коронавирус инфекциясини аниқлаш учун 70 мингдан ортиқ кишида тест ўтказилган.

Фото: Getty Images

Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков 9 апрель ҳолатига кўра Ўзбекистонда коронавирусга чалинганларнинг ҳолати бўйича ахборот берди. 

«Айни вақтда Ўзбекистонда коронавирусга чалинганлар сони 555 нафарни ташкил этмоқда. Вирусология илмий-текшириш институти раҳбариятидан олинган маълумотларга кўра, бу институт клиникасида даволанаётган 99 нафар беморнинг 25 нафарида пневмония белгилари кузатиляпти. Беморларнинг 7 нафарининг аҳволи оғир. Эпидемиология, микробиология ва юқумли касалликлар илмий-текшириш институтида даволанаётган 88 нафар беморнинг 3 нафари аҳволи ўрта оғир, деб баҳоланяпти. 

Коронавирус бўйича эпидемик вазият мураккаблашган вақтдан бошлаб шу кунгача 70 мингдан ортиқ фуқаролар коронавирус бўйича текширувдан ўтказилди. Кеча 9 мингдан ортиқ киши коронавирусни аниқлаш бўйича тест топширди ва 35 ҳолатда касаллик аниқланди.

Бундан кўриниб турибдики, тиббий назорат остига олинган 86 мингдан ортиқ аҳоли орасида касаллик аниқланиши давом этяпти. Демак, ҳаммамиз сергак бўлишимиз, карантин талабларига тўла риоя этишимиз керак. Ҳар бир ҳаракатимиз эпидемик вазият мураккаблашиши ёки барқарорлашувига таъсир кўрсатади», деди Нурмат Отабеков.

 

Ўзбекистонда 70 мингдан ортиқ киши коронавирусга тест топширган 👉 https://kun.uz/14693275

Posted by Kun.uz on Thursday, April 9, 2020

 

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top