AQSh Sog‘liqni saqlash vazirligi mRNK-vaksinalari uchun mablag‘ni qaytarib oldi

AQSh Sog‘liqni saqlash vazirligi gripp viruslari yoki koronaviruslar keltirib chiqaradigan respirator kasalliklarning oldini olish uchun mo‘ljallangan mRNK-vaksinalarini ishlab chiquvchi farmatsevtika kompaniyalarini 500 million dollardan mahrum qiladi. Bu haqda 5 avgust, seshanba kuni vazirlik rahbari kichik Robert Kennedi ma’lum qildi.

AQSh Sog‘liqni saqlash vazirligi veb-saytida e’lon qilingan hujjatda aytilishicha, qaytarib olingan mablag‘lar yuqori nafas yo‘llari kasalliklariga qarshi vaksinalarni ishlab chiqish bo‘yicha 22 loyihaga yo‘naltirilishi kerak edi, chunki to‘plangan ma’lumotlar ushbu dorilarning samarasizligini ko‘rsatmoqda. «Biz ushbu mablag‘ni virus mutatsiyaga uchraganda ham samarali bo‘lib qoladigan xavfsizroq, kengroq emlash platformalari sohasiga o‘tkazmoqdamiz», deyiladi vazirlik press-relizida.

Moliyalashtirilishi qisqartirilgan ba’zi loyihalar AQShning yetakchi farmatsevtika kompaniyalari, xususan Moderna va Pfizer tomonidan amalga oshirilgan. Biroq, bu chora boshqa sohalarda mRNK-texnologiyasidan foydalanishni o‘rganish bo‘yicha loyihalarga ta’sir qilmaydi, deyiladi press-relizda.

Kichik Robert Kennedi mRNK-texnologiyasi asosida yaratilgan vaksinalarning tanqidchisi sifatida tanilgan. Biroq, uning o‘zi emlashga qarshi shaxs sifatida ko‘rilmasligini istaydi.