«Biz bu jangda g‘olib bo‘ldik» – Yangi Zelandiya bosh vaziri mamlakat koronavirusni yengganini e'lon qildi
Yangi Zelandiya bosh vaziri Jasinda Ardern mamlakat koronavirusni yengganini e'lon qildi. Uning aytishicha, virusga chalinishning yangi holatlari aniqlanmagan.
«Yangi Zelandiyada bugun koronavirus tarqalish holatlari aniqlanmadi. Biz bu jangda g‘olib bo‘ldik», deb Jasinda Ardernning so‘zlarini keltirmoqda VVS. Bosh vazirning aytishicha, mamlakat karantin choralarini erta kiritgani va fuqarolarning unga amal qilgani natijasida kasallikni yengishga erishgan.
Yangi Zelandiya kasallanganlar soni bir necha nafar bo‘lgandayoq karantin joriy etgandi. 26 martdan mamlakatda maktab, ofis va plyajlar yopilgan. Ekspertlarning aytishicha, Yangi Zelandiyaga koronavirusni yengishda geografik joylashuvi yordam bergan. Mamlakat orol bo‘lgani uchun chegaralarni yopish va immigratsiyani nazorat qilishda qiynalmagan.
Dushanba kuni mamlakat karantinning to‘rtinchi darajasidan uchinchi darajasiga qaytdi. Virus bilan kasallanish holatlari aniqlanmani sabab korxonalarga faoliyatini tiklashga ruxsat berildi. Ammo ijtimoiy masofani saqlash tartibi bekor qilinmaydi.
Guardian`ning yozishicha, maktablar qisman tiklanishi mumkin. 10 yoshgacha bo‘lgan bolalar maktablarga qaytishiga ruxsat beriladi, chunki ular masofaviy ta'lim olishda qiynalgan.
«Biz iqtisodiyotni tiklaymiz, ammo ijtimoiy hayotni emas», degan Jasinda Ardern Yangi Zelandiyada ishlab chiqarish qayta tiklanishi haqida. 28 apreldan mamlakatda millionlab odamlar ishga qaytishlari mumkin bo‘ladi.
Ma'lumot uchun, Yangi Zelandiyada 1 122 kishi koronavirus yuqtirgan va 19 ta o‘lim holati qayd etilgan. 27 aprel kuni mamlakatda birorta virus yuqtirish holati aniqlanmagan.
Mavzuga oid
23:07 / 05.09.2024
Yangi Zelandiyada maori xalqining yangi qirolichasiga toj kiydirildi
22:28 / 03.09.2024
Yangi Zelandiya chet ellik turistlarga solinadigan soliqni keskin oshiradi
16:04 / 23.12.2023
Yo‘qotilgan pullar, ishsizlik va stress – O‘zbekistondan Yangi Zelandiyaga borgan o‘zbeklar nimaga chuv tushdi?
15:09 / 28.11.2023