«Ko‘chma laboratoriyalarga ehtiyoj yo‘q» – SSV vakili koronavirus uchun tahlil olinadigan laboratoriyalar yetarli ekanini ma'lum qildi

Sog‘liqni saqlash vazirligi huzuridagi koronavirusga qarshi kurash shtabi a'zosi Habibulla Oqilov navbatdagi brifing chog‘ida qator savollarga javob berdi.

– Koronavirusni laborator tekshirish usullari – tomoqdan surtma olib tekshirishda, bemorning virusdan aniq xoli bo‘lganini aniqlab bera oladimi, ya'ni bu qay darajada ishonchli?

– O‘zbekistonda COVID-19 virusini aniqlash uchun PsR (polimeraz zanjir reaksiyasi) ishlatiladi. Uning aniqlash foizi juda yuqori bulib, 90 foizdan oshadi.

– Karantindan so‘ng ham niqob taqish, himoya vositalaridan foydalanish davom ettiriladimi?

– Bu o‘sha paytdagi vaziyatga JSSTning talab va tavsiyalariga bog‘liq. Masofa saqlash va gigiyena qoidalariga rioya qilishga odatlanish bundan keyin ham, tavsiyalar bo‘lish bo‘lmasligidan qat'i nazar davom etsa kerak.

– Singapur universitetining O‘zbekistonda koronavirus infeksiyasining tarqalishi joriy yilning 24 mayida to‘xtashiga oid prognozi qanchalik haqiqat?

– Singapur universiteti olimlari maxsus dasturlar yordamida joylardagi vaziyatni o‘rganib, matematik model yaratishgan. Ammo ularning o‘zlari ham bu matematik hisob-kitoblar ekanligi va ular real hayotdan farqlanishi mumkinligini tan olishgan.

– Hozirgi holatda shahardan shaharga, tumandan tumanga o‘tishdagi postlarda avtomobillarni dezinfeksiyalash ishlari to‘xtab turibdi. Dezinfeksiyalash majburiyati qoldirildimi?

– Epidemiologik osoyishtalik agentligi qayd etishicha, hozirgi kunda karantin talablari bosqichma-bosqich yumshatilib, viloyatlararo qatnovlarga ruxsat berildi. Ammo dezinfeksiyalash tadbirlari bekor qilingani yo‘q.

– Bir tanishim test topshiribdi. Birinchi marta test topshirish orqali tahlil natijasi 50/50, ya'ni aniq chiqmaydi, faqat 14 kunlik kuzatuvdan so‘ng aniq natija beradi deyapti. Shu rostmi?

– Bu noto‘g‘ri ma'lumot. Polimeraz zanjir reaksiyasi juda aniq javob beradi. Ikkinchi marta zararlangan bemor tuzalganini aniqlash uchun analiz takrorlanadi.

– Isroilda koronavirus tekshiriladigan budkalar tashkil qilingani haqida ma'lumotlar tarqaldi. Bizda ham ana shunday test olish uchun joylar tashkil etilishi mumkinmi?

– O‘zbekistonda koronavirusni aniqlash uchun analiz oladigan laboratoriyalar yetarli miqdorda tayyorlangan. Ularda kerakli asbob uskunalar, reaktivlar va ishlaydigan mutaxassislar yetarli. Shuning uchun ko‘chma laboratoriyalar ochishga ehtiyoj yo‘q.