15:35 / 16.05.2020
5857
Пентагон Афғонистондан ҳарбийлар ўз муддатида чиқарилишини маълум қилди

Афғонистонда хорижлик ҳарбийлар миқдорининг камайиш жараёни давом этмоқда ва белгиланган муддатда якунланади. Бу ҳақда Пентагон расмий вакили Жонатан Ҳоффман хабар берди.

Фото: EPA-EFE/JALIL REZAYEE

«Ҳарбийлар сонининг камайиши давом этмоқда. Биз жараён «Толибон» билан келишган ҳолда белгиланган муддатда якунланишини кутмоқдамиз», – деб Ҳоффманнинг сўзларини келтирган ТАСС. АҚШ мудофаа вазирлиги расмий вакили ҳарбийларнинг қанчаси олиб чиқилганига аниқлик киритмади.

29 февраль куни Доҳада АҚШ ва «Толибон» радикал ҳаракати ўртасида тинчлик келишуви имзоланган эди. Битимга кўра, АҚШ ва унинг итифоқчилари 14 ой ичида Афғонистондан ҳарбийларини олиб чиқиб кетиши керак.

Бундан ташқари, Вашингтон май ойига қадар толибларни БМТ санкция рўйхатидан чиқарилишига кўмак беришга, август ойигача эса уларга нисбатан ўз санкцияларини бекор қилишга ваъда берган.

Top