13:33 / 12.06.2020
32585
«Ўзгидромет» дам олиш кунлари қандай об-ҳаво кутилаётганини маълум қилди

Бугун охирги кунларда мамлакатга нисбатан салқин ҳаво олиб кирган антициклон чегараси Ўзбекистон ҳудудидан чекинишни бошлайди. 

Кундузги ҳарорат аста-секин кўтарилиб, 33-35 даражага, шимолда, жануб ва чўл зонасида 37 даражагача етади, деб хабар бермоқда «Ўзгидромет».

Бутун республика бўйича об-ҳаво ёғингарчиликсиз бўлади, фақат тоғли туманларда куннинг иккинчи ярмида айрим жойларга қисқа муддатли ёмғир ёғиши, момақалдироқ бўлиши мумкин.

Дам олиш кунлари республика ҳудудига хорижий жанубдан иссиқ ва қуруқ ҳаво тарқалади. Тунги ҳарорат 18-20 даража атрофида бўлади, кундузи термометр устунчаси 35-37 даражагача, шимолда, жануб ва чўл зонасида 38-40 даражагача кўтарилади, бу ўртача кўп йиллик қийматлардан 2-4 даражага юқори.

Барча вилоятларда асосан ҳаво очиқ бўлади, фақат республиканинг тоғли ҳудудларида шанба куни об-ҳаво бироз беқарор бўлади, куннинг иккинчи ярмида қисқа муддатли ёмғир ёғиши, момақалдироқ бўлиши мумкин.

Top