11:40 / 19.06.2020
1775
«Энергетик тежамкорлик жамғармаси» ташкил этилиши кутилмоқда

Сенатнинг 5-ялпи мажлисида «Энергиядан оқилона фойдаланиш тўғрисида»ги қонунга ўзгартиш ва қўшимчалар киритиш ҳақида»ги қонун маъқулланди. Мазкур қонун билан «Энергетик тежамкорлик жамғармаси»ни ташкил этиш масаласи кўзда тутилмоқда.

Энергетика вазири Алишер Султонов жамғарманинг мақсадлари ҳақида маълумот берди.

«Жамғарма маблағлари барча соҳалардаги энергия самарадорлигини ошириш, қайта тикланувчи энергия манбаларини жорий этиш бўйича лойиҳаларни молиялаштиришга сарфланади. Шунингдек, хорижий экспертларни жалб этган ҳолда қайта тикланувчи энергия манбаларини жорий этиш соҳасидаги мутахассисларни тайёрлаш, малакасини ошириш ва қайта тайёрлаш, хўжалик юритувчи субъектларда энергия аудитини ўтказишни молиялаштириш ҳам жамғарма мақсадлари сифатида белгиланмоқда.

Жамғарма маблағларидан фойдаланиш шаффофлигини таъминлаш мақсадида кузатув кенгаши ташкил этилади. Маблағлар тақсимоти инсон омилисиз, онлайн тарзда амалга оширилиши назарда тутилган», дея вазирнинг сўзларини келтирмоқда Kun.uz мухбири.

Маълум қилинишича, мазкур жамғарма якуний истеъмолчиларга етказиб бериладиган электр энергияси ва табиий газ учун энергия таъминоти корхоналари ҳисоб-рақамларига тушадиган кунлик маблағлардан 1 фоиз миқдоридаги ажратма, халқаро донор ташкилотлари ва молия институтларининг кредитлари ва грантлари, жамғарма маблағларидан фойдаланиш натижасида келиб тушадиган тушумлар ҳисобига ташкил этилади.

Шунингдек, қонунга энергия самарадорлик кўрсаткичларига товарларнинг мувофиқлиги бўйича мажбурий сертификатланиши тўғрисидаги норма киритилмоқда.

Top