Banklarga naqd pul tushumi karantingacha bo‘lgan davrdagi miqdorga yaqinlashmoqda

O‘zbekiston Markaziy banki 2020 yil aprel-iyun oylaridagi naqd pul muomalasi bo‘yicha qisqacha sharhni taqdim etdi.

Ma'lum bo‘lishicha, karantin talablari eng qat'iy bo‘lgan aprel oyida banklarga naqd pul tushumi mart oyiga nisbatan 41 foizga kamaygan.

May oyidan karantin yumshatila boshlagach, iyun oyida banklarga naqd pul tushumi aprelga nisbatan 85 foizga ko‘payib, 14,6 trln so‘mni tashkil etgan.

«Biroq, iyun oyidagi ko‘rsatkich karantin sharoitidan oldingi davrdagi holatdan (joriy yil yanvarda – 15,8 trln. so‘m ) biroz kamligicha qolmoqda», – deyiladi xabarda.

Naqd pul tushumlari hajmi va tarkibi dinamikasi (mlrd so‘mda)
Info: Markaziy bank

Ma'lum qilinishicha, 2020 yilning iyun oyida bank kartalariga jami 15,9 trln. so‘mlik mablag‘lar kelib tushib, ushbu davrda bank kartalaridagi 6,1 trln. so‘m aholi tomonidan naqdlashtirib olingan.

Bank kartalariga kelib tushgan mablag‘lar va ularni naqdlashtirish hajmi dinamikasi (mlrd so‘mda)
Info: Markaziy bank

Qisqa sharhda hisobot davridagi naqd pul tushumlari hajmi va tarkibi dinamikasi, naqd puldagi chiqimlar hajmi va ularning tarkibiy dinamikasi, banklardan naqd puldagi chiqimlar hajmi va ularning maqsadlari bo‘yicha tarkibiy dinamikasi ham keltirib o‘tilgan.