10:50 / 15.07.2020
7965
Озарбойжон шаҳарларида миллий армия қўллаб-қувватловига намойишлар бўлиб ўтди

Озарбойжон пойтахти Боку аҳолиси Арманистон билан чегарадаги жанговар ҳаракатларда иштирок этаётган армия қўллаб-қувватловига намойишга чиқди. Охирги кунларда Озарбойжон ва Арманистон чегарасида икки давлат ҳарбийлари иштирокида қуролли тўқнашувлар бўлиб ўтмоқда. 

Фото: РИА Новости

Oxu.Az порталининг хабар беришича, мингдан кўпроқ одам миллий байроқларни ҳилпиратиб, “Шаҳидлар ўлмас, Ватан ягона”, “Армияга шон-шараф”, “Аскарлар олға”, “Бош қўмондон, сафарбарлик эълон қил” деган шиорларни айтиб, “Шаҳидлар хиёбони” томон юриб боришган. Худди шунга ўхшаш намойишлар мамлакатнинг қолган шаҳарларида ҳам бўлиб ўтган.  

Бундан ташқари, Бокуда намойишчилар мамлакат парламентига бостириб киришган. Полиция бинога кирган намойишчиларни ҳайдаб чиқарган. Полициячилар сув пуркагичлар қўллашига тўғри келган.

Озарбойжон ва Арманистон чегарасидаги қуролли тўқнашувлар 12 июлдан бери давом этмоқда. Жанглар давомида икки томон ҳам йўқотишларга учраган.

14 июлда Арманистон 4 ҳарбий, жумладан бир майор, бир капитан ва 2 нафар кичик сержантни йўқотганини маълум қилган. Озарбойжонда эса жанглар давомида генерал-майор ва полковник ҳамда пастроқ унвондаги бир неча ҳарбий ҳалок бўлгани маълум қилинган. Шунингдек, икки давлат мудофаа вазирликлари бир-бирларининг ҳарбий пунктларини йўқ қилганини маълум қилган.

Мавзу
Озарбойжон-Арманистон можароси
12 июль куни Озарбойжон шимоли-ғарбидаги Товуз вилояти ҳудудида икки давлат қўшинлари ўртасида тўқнашув содир бўлди.
Барчаси
Top