17:03 / 12.08.2020
23569
Сурхондарё вилоятининг айрим ҳудудларида карантин чекловлари юмшатилди

Сурхондарё вилоятининг эпидемиологик вазият қониқарли бўлган Бандихон, Бойсун, Қизириқ, Олтинсой, Сариосиё ва Узун туманларида карантин чекловлари юмшатилди.

Жумладан, ушбу туманларда санитария талабларига қатъий риоя қилган ҳолда, 

  • умумий овқатланиш шахобчалари (ресторан ва кафеларда банкетлар ҳамда бошқа оммавий тадбирларни ўтказишга йўл қўйилмайди); 
  • буюм ва қурилиш моллари бозорлари;
  • савдо ва маиший хизмат кўрсатиш нуқталари фаолиятига рухсат берилди.

Шунингдек, автотранспорт воситаларида махсус рухсатномасиз (стикерсиз) тегишли ҳудуд доирасида ҳаракатланишга, туманларга кириш-чиқишга фақатгина куннинг муайян вақтида (соат 07:00дан - 10:00 гача, соат 18.00дан  - 21.00гача) фуқароларнинг иш жойига бориб-келиши, дори воситалари, озиқ-овқат ва биринчи галдаги маҳсулотларни харид қилиш учун рухсат берилди.

Махсус рухсатнома (стикер) асосида ҳаракатланадиган автотранспорт воситалари ҳамда Республика махсус комиссияси қарори билан тасдиқланган айрим тоифадаги автотранспорт воситалари ҳаракатланишига махсус рухсатномалар талаб этилмайдиган ҳолатлар бундан мустасно.

«Вилоятда эпидемиологик вазиятдан келиб чиққан ҳолда карантин талаблари босқичма-босқич юмшатилиб борилади. Воҳадошларимиздан ўз саломатликларига бефарқ бўлмаган ҳолда карантин талабларига қатъий амал қилишларини сўраймиз», дейилади вилоят ҳокимлиги матбуот хизмати хабарида.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top