21:41 / 13.08.2020
2824
АҚШ штатларидан бирида полициячиларга иш вақтида ниқоб тақиш тақиқланди
Фото: Reuters

АҚШнинг Флорида штатида жойлашган Марион округи шерифи ўз қўл остидаги полициячиларга иш вақтида ниқоб тақмасликни буюрди. Бу ҳақда Foxnews телеканали хабар берди.

Шериф Билли Вудс айни вақтда АҚШда полициячиларга муносабат ёмонлашгани сабабли, полициячиларда ниқоб бўлмаслиги уларнинг аҳоли билан мулоқотини енгиллаштириши ҳақидаги қарорга келган.

“Менинг буйруғим хизмат ўтаётган, полиция офисида ишлаётган ҳар бир ходимга тааллуқлидир”, деб маълум қилган шериф.

Шериф турмалар, мактаблар, шифохоналар ёки коронавирусга чалинганликда гумон қилинган одамлар билан ишлайдиган ходимлар учунгина ниқоб тақишга рухсат берган. Вудснинг таъкидлашича, полиция бўлимига ташриф буюрувчилар ҳам ниқобсиз бўлишлари керак. Бу бўлимга келувчиларни идентификация қилиш учун талаб этилади.   

Шериф бу қарорга келишдан олдин бошқа полициячилар билан биргаликда АҚШ президенти Дональд Трамп билан телефон орқали суҳбатлашганини маълум қилган. Трампнинг ўзи ҳам анча вақт давомида ниқоб тақишдан бош тортиб келган.   

Флоридада ниқоб тақиш мажбурий ҳисобланмайди, бироқ штат АҚШда коронавирус тарқалишининг энг йирик ўчоқларидан бири бўлиб қолмоқда. Охирги икки кун ичида штатда коронавирусдан 450 дан кўпроқ одам вафот этган. Умумий ҳисобда пандемия бошидан бери Флоридада вирусдан 8,7 мингдан кўпроқ одам вафот этган, 550 мингдан кўпроқ одам унга чалинган.

Top