Turkiya Rossiyani Liviyaga yuzlab yollanma askarlarni jo‘natishda aybladi

Rossiya Liviya sharqiga rossiyalik mutaxassislar tomonidan tayyorgarlikdan o‘tgan suriyalik yollanma askarlarni tashladi. Bu haqda Anadolu agentligi yozmoqda.

Agentlikning mahalliy manbalarga tayanib xabar berishicha, Liviyaga 400ga yaqin suriyalik jo‘natilgan. Ular 18 sentabr kuni rossiyaliklar rahbarligi ostida tayyorgarlik ko‘rgan Qamishli shahri yaqinidan Rossiyaning Xmeymim aviabazasi joylashgan Latakiya viloyatiga, u yerdan esa Liviyaga tashlangan.

 Ma'lumot berilishicha, rossiyalik harbiylar har bir yollanma askar uchun oyiga 1,5-2 ming dollardan to‘lamoqda.

Liviyada milliy kelishuv hukumati va feldmarshal Xalifa Haftar qo‘mondonligi ostidagi Liviya milliy armiyasi o‘rtasidagi to‘qnashuvlar davom etmoqda. Milliy kelishuv hukumatini Turkiya, Haftarni esa Misr va Saudiya Arabistoni qo‘llab-quvvatlamoqda.