Rafael Nadal Roland Garros finaliga 13-marta chiqib rekord o‘rnatdi

“Tuproqli kortlar qiroli” yarim finalda argentinalik tennischi Diyego Shvarsman bilan uchrashib, uni 6:3, 6:3, 7:6 (7:0) hisobida mag‘lubiyatga uchratdi. 

Ushbu tennischilarning Rimda 19 sentyabrda kechgan avvalgi to‘qnashuvi Shvarsman foydasiga yakunlangandi.

34 yoshli Nadal Roland Garros finaliga 13-marta chiqib, “Katta dubulg‘a” seriyasiga kiruvchi bir turnirning finaliga chiqish sonlari bo‘yicha rekord o‘rnatdi. Shveytsariyalik tennischi Rojyer Federer Uimbldonning finalida 12 marta ishtirok etgan. Bundan tashqari, Nadal biror marta Roland Garros finalida yutqazmagan va ushbu musobaqadagi g‘alabalar bo‘yicha rekordchi (12 marta g‘olib bo‘lgan) hisoblanadi.

Ispaniyalik sportchi Fransiya ochiq chempionati uchrashuvlarida bor-yo‘g‘i 2 marta – 2009 yilda shved Robin Syoderlingga va 2015 yilda chorak finalda Novak Jokovichga yutqazgan. 

Umuman olganda, ispaniyalik tennischi hisobida “Katta dubulg‘a”ga kiruvchi musobaqalarda 19 ta g‘alaba bor. Agar u Roland Garros’da g‘alaba qozonsa, “Katta dubulg‘a” musobaqalaridagi g‘alabalar soni bo‘yicha afsonaviy Rojyer Federerga tenglashib oladi.  

Musobaqaning ikkinchi finalchisi dunyoning birinchi raqamli tennischisi, serbiyalik Novak Jokovich va grek Stefanos Tsitsipas o‘rtasidagi to‘qnashuvda ma'lum bo‘ladi.

Musobaqaning mukofot jamg‘armasi 38 mln yevroni tashkil qiladi va u 11 oktyabrda o‘z nihoyasiga yetadi.