Rafael Nadal yil tennischisi deb topildi

Professional tennischilar assotsiatsiyasi (ATP) ATP Awards 2019 mukofoti g‘oliblarini e'lon qildi. Unga ko‘ra, ispan tennischisi, mavsumni birinchi raqamli tennischi maqomida yakunlagan Rafael Nadal “yil o‘yinchisi” deb topildi. 33 yoshli Nadal mavsum oxirida ATP yetakchisi bo‘lgan tarixdagi eng yoshi katta tennischi bo‘ldi.
 
Nadal 2019 yilda “Katta dubulg‘a”ga kiruvchi 3 ta musobaqa finalida o‘ynagan va ulardan “Rolan Garros” hamda AQSh ochiq chempionatida g‘alaba qozongan. Tennischi Avstraliya ochiq chempionati finalida serbiyalik Novak Jokovichga mag‘lub bo‘lgan.

E'tiborlisi, muxlislar talqiniga ko‘ra “yil o‘yinchisi” sifatida shveysariyalik Rojyer Federer e'tirof etilgan.

Shuningdek, boshqa yo‘nalishlar bo‘yicha g‘oliblar ham e'lon qilingan:  

Eng yaxshi juftlik: Xuan Sebastyan Kabal va Robert Fara.
Yil qaytishi: Endi Marrey.
Yilning eng taraqqiy etgan o‘yinchisi: Matteo Berrettini.
Yilning eng yaxshi yangi o‘yinchisi: Yannik Sinner.
Sportcha xatti-harakat va halol o‘yin uchun Stefan Edberg mukofoti: Rafael Nadal.
Yil murabbiyi: Jil Servara (Daniil Medvedev murabbiyi).
Yil turnirlari: Doha (ATP 250), Akapulko (ATP 500), Indian-Uells (ATP 1000).

ATP’ning keyingi mavsumi 6 yanvarda Avstraliyaning Brisbenida ATP kubogi va Dohada ATP 250 Qatar Open seriyasiga kiruvchi musobaqa bilan boshlanadi.