Pichoq va shu kabi boshqa ashyolarni jamoat joylarida g‘ilofsiz olib yurish taqiqlanadi

21 oktabr kungi yalpi majlisda senator Sodiqjon Turdiyev yuqoridagi kabi holatlarda fuqaro jarimaga tortilib, u olib yurgan ashyo musodara qilinishi qanchalik to‘g‘ri ekani haqida savol berdi.

Ichki ishlar vaziri o‘rinbosari, general-mayor Azizbek Ikromovning ta'kidlashicha, qonunda jamoat joylarida pichoq yoki qurol o‘rnida foydalanish mumkin bo‘lgan shunga o‘xshash ashyolar faqat g‘ilofga solingan holda olib yurish belgilangan. U ashyolar g‘ilofsiz, ochiq holda olib yurilsagina jarima qo‘llanishini aytdi.

«Ishlab chiqilgan qonunda va Ma'muriy javobgarlik to‘g‘risidagi kodeksda pichoq yoki shunga o‘xshash qurol o‘rniga o‘tuvchi ashyolar olib yurishga cheklovlar yo‘q. Bu yerda aniq yozilganki, ochiq holdagi g‘ilofsiz pichoqlarni olib yursa bo‘ladi. Kasbiy, sport faoliyatlari yoki xo‘jalik maqsadlarida bemalol pichoq bilan yurish mumkin. Faqat ko‘chada, jamoat joylarida yopiq, g‘ilofga solingan holda olib yurish talab etiladi. Bilasizlar, pichoqlar bozorlarda sotiladi, unga cheklovlar qo‘yilmagan.

Bundan tashqari, bozorda xo‘jalik uskunalarini bemalol borib o‘tkirlasa bo‘ladi. Faqat jamoat joylarda g‘ilof bilan olib yurish kerak. 185-modda 2-qismi bilan sovuq qurol sifatida foydalanilishi mumkin bo‘lgan ashyolarni ochiq holda (g‘ilofsiz) olib yurganlik bo‘yicha protokol tuzish huquqi faqat profilaktika inspektorlariga beriladi. Bu jarayonda qaror chiqarish huquqi esa sudlarga berilgan. Ko‘chada yuradigan ichki ishlar xodimlariga bunday huquq berilmagan.

Qonun qabul qilingandan keyin biz, albatta, bu bo‘yicha darslarni o‘tkazamiz. Qonun mazmun-mohiyatini barcha profilaktika inspektorlariga tushuntiramiz», – dedi Azizbek Ikromov.