23:18 / 04.11.2020
2628
АҚШда сайловлардаги давомат 120 йил ичида энг юқориси бўлди  

АҚШда 2020 йилги президент сайловлари охирги 120 йил ичида энг кўп сонда сайловчиларни жалб қила олди. Охирги маълумотларга кўра, сайловларда овоз берувчилар иштироки 66,9 фоизни ташкил қилган.   

Фото: Twitter /umeer__ali

The Hill нашри United States Election Project лойиҳасининг дастлабки натижаларига таяниб хабар беришича, сайловларда 160 млн америкалик иштирок этган, бу эса жами овоз берувчиларнинг 66,9 фоизини ташкил қилади. 

“Бу ностандарт ҳолатдир. 2020 йилги президент сайловларида охирги 120 йил ичидаги энг юқори иштирок қайд этилди”, деб маълум қилган лойиҳа раҳбари, Флорида университети сиёсатшунослик профессори Майкл МакДональд.

Таъкидланишича, охирги марта бундай юқори кўрсаткич 1900 йилда қайд қилинган ва 73,7 фоизни ташкил қилган.

Шу билан бирга, МакДональд овозлар ҳисобланиши давом этаётгани ва иштирок бўйича маълумотлар ҳали якуний эмаслигини маълум қилган.

АҚШда президент сайловлари икки поғонали тизим бўйича ўтади: умумхалқ сайловларидан 41 кун ўтиб 50 штатнинг ҳар биридан ва Колумбия округидан сайловчилар ҳайъати аъзолари овоз беради. Сайловларда ғалаба қозониш учун номзодлардан бири ҳайъат аъзоларининг камида 270та овозини тўплаши лозим. 

Охирги маълумотларга кўра, президент сайловларида ҳозирча Жо Байденда сайловчилар ҳайъатининг 238та, амалдаги президент Дональд Трампда эса 213та овози бор. Айни вақтда овозлар ҳисобланиши давом этмоқда.

 

Мавзу
АҚШ-2020
2020 йилнинг 3 ноябрида АҚШда президентлик сайловлари бўлиб ўтади. 3 февраль куни демократлар қароргоҳида бирламчи сайловлар - кокуслар ва праймеризлар бошланган.
Барчаси
Top