Seysmologiya sohasi maxsus jamg‘arma tomonidan qo‘llab-quvvatlanadi

Prezidentning 30.07.2020 yildagi «O‘zbekiston Respublikasi aholisi va hududining seysmik xavfsizligini ta'minlash tizimini tubdan takomillashtirish chora-tadbirlari to‘g‘risida»gi PQ-4794-son qarori ijrosini ta'minlash yuzasidan hujjat bilan quyidagilar tasdiqlanadi:

• O‘zbekiston Respublikasi Vazirlar Mahkamasi huzuridagi Seysmologiya, inshootlarning seysmik mustahkamligini va seysmik xavfsizlikni ta'minlash sohasini qo‘llab-quvvatlash jamg‘armasi to‘g‘risidagi nizom;
• O‘zbekiston Respublikasi Vazirlar Mahkamasi huzuridagi Seysmologiya, inshootlarning seysmik mustahkamligini va seysmik xavfsizlikni ta'minlash sohasini qo‘llab-quvvatlash jamg‘armasi kengashining tarkibi.
• Jamg‘arma yuridik shaxs hisoblanmaydi, uning mablag‘lari Fanlar Akademiyasi M.T.O‘rozboyev nomidagi Mexanika va inshootlar seysmik mustahkamligi institutining shaxsiy g‘azna hisobvaraqlarida yig‘iladi.
• Jamg‘arma quyidagi mablag‘lar hisobiga shakllantiriladi:
• respublika budjetidan amaliy tadqiqotlar va innovatsion ishlarni ilmiy-texnika dasturlari uchun ajratilgan grant mablag‘lari;
• Vazirlar Mahkamasining hisob-kitoblariga asosan respublika budjetidan ajratiladigan mablag‘lar;
• xorijiy (xalqaro) moliya institutlari va boshqa xorijiy donorlarning texnik ko‘mak mablag‘lari va grantlari;
• Jamg‘armaning bo‘sh mablag‘larini tijorat banklarining depozitlariga joylashtirishdan olinadigan daromadlar;
• qonunchilikda taqiqlanmagan boshqa manbalar.

Quyidagilar Jamg‘arma mablag‘lari sarflanadigan asosiy yo‘nalishlar hisoblanadi:

• ilmiy tadqiqotlarga ko‘maklashish, tadqiqot ishlarini qo‘llab-quvvatlash uchun grantlar ajratish;
• kadrlar tayyorlash, qayta tayyorlash va ularning malakasini oshirish dasturlarini amalga oshirish, shuningdek konferensiyalar, seminarlar va boshqa tadbirlarni, shu jumladan xorijiy mamlakatlarda tashkil qilish va ularda ishtirok etish;
• ilmiy laboratoriyalarni zarur asbob-uskunalar, hisoblash texnika vositalari hamda butlovchi materiallar bilan ta'minlash va ularni o‘rnatish;
• respublika aholisi va hududining seysmik xavfsizligini ta'minlash sohasiga raqamlashtirilgan texnologiyalarni joriy etish, seysmik chidamli qurilish bo‘yicha milliy dasturlarni ishlab chiqish;
• seysmologiya, inshootlarning seysmik mustahkamligini va seysmik xavfsizlikni ta'minlash uchun mas'ul davlat organlari va tashkilotlarining sohaga oid faoliyat yo‘nalishi bo‘yicha moddiy-texnika bazasini mustahkamlash;
• respublikaning seysmik faol hududida joylashgan mavjud bino va inshootlarning elektron texnik pasportlarini shakllantirish;
• yuksak ilmiy natijalarga erishgan va fan rivojiga munosib hissa qo‘shgan olimlarni, shu jumladan yosh ilmiy xodimlarni qo‘llab-quvvatlash.

 Hujjat 31.10.2020 yildan kuchga kirdi.