Hukumat zaxira jamg‘armasi va maqsadli jamg‘armalar transfertlari qayta belgilanadi

25 dekabr kuni qabul qilingan qonun bilan “2025 yil uchun O‘zbekiston Respublikasining davlat budjeti to‘g‘risida”gi qonunga o‘zgartirishlar kiritildi. Hujjatda Vazirlar Mahkamasining zaxira jamg‘armasi hajmi hamda davlat budjetidan davlat maqsadli jamg‘armalariga ajratiladigan transfertlar miqdori qayta belgilanishi nazarda tutilgan.

Kiritilgan o‘zgartirishlarga ko‘ra, ta’lim, sog‘liqni saqlash, madaniyat va sportni rivojlantirish, shuningdek “Kambag‘allikdan farovonlik sari” dasturi doirasidagi tadbirlarni moliyalashtirish uchun qo‘shimcha mablag‘lar ajratiladi.

Shu bilan birga, ko‘p kvartirali uy-joylar va ijtimoiy soha muassasalarida energiya samaradorligini yaxshilash bilan bog‘liq tadbirlar ham qo‘shimcha moliyalashtiriladi.

Qonun doirasida, shuningdek, davlat maqsadli jamg‘armalarining daromadlari va xarajatlari ko‘rsatkichlariga o‘zgartishlar kiritilishi belgilangan.

Bundan tashqari, budjet mablag‘laridan foydalanishda maqsadlilik va samaradorlikni oshirish, budjet intizomini mustahkamlash maqsadida ayrim mablag‘larni maqbullashtirish va ularni qo‘shimcha xarajatlarga yo‘naltirish choralari ham ko‘zda tutildi.