Disney 1980 yildan beri ilk bor yilni zarar bilan yakunladi

Disney kompaniyasi oktyabr boshida yakunlangan 2020 moliyaviy yil va uning 4-choragi bo‘yicha hisobot taqdim etdi. Unga ko‘ra, kompaniya 2019 yil ko‘rilgan 10,4 mlrd dollar foyda bilan 2020 moliyaviy yilni 2,8 mlrd dollar zarar bilan yakunlagan. Ta'kidlanishicha, kompaniya bunday salbiy natijani 1980 yildan beri ilk bor qayd qildi.
  
Kompaniyaning 4-chorakdagi tushumi 23 foizga kamayib, 14,7 mlrd dollarni tashkil qilgan. Ushbu chorakda ko‘rilgan sof zarar esa 710 mln dollarni tashkil qilgan. Vaholanki, kompaniya 2019 moliyaviy yil 4-choragida 777 mln dollar foyda ko‘rgan. 

Kompaniya qatorasiga ikkinchi chorakni zarar bilan yakunlagan. Bungacha Disney 2001 yildan beri chorak bo‘yicha zarar ko‘rmay kelgan. Kompaniyaning tushumi bir yil ichida 6 foizga kamayib, 65,4 mlrd dollarni, sof zarari esa 2,8 mlrd dollarni tashkil qilgan.            

Biroq investorlar Disney natijalarini ijobiy qabul qilishdi va kompaniya aksiyalari hisobot e'lon qilingandan keyin 6 foizga qimmatladi. Bu holat, birinchidan, natijalar kutilgandan ancha yaxshiroq bo‘lgani bilan bog‘langan. Ikkinchidan, kompaniyaning 2019 yilda ishga tushirilgan Disney+ striming xizmati yaxshi natijalar ko‘rsatgan: uning obunachilari soni avgustdagi 60 mlndan oktyabr boshida 73,7 mlngacha oshgan, 4-chorakda ko‘rgan zarari esa tahlilchilar prognoz qilgandan ancha kamroq bo‘lgan va 580 mln dollarni tashkil qilgan. 

Kompaniyaning ko‘ngilochar bog‘lar va iste'molchilik mahsulotlariga ixtisoslashgan bo‘linmasi 4-chorak davomida 1,1 mlrd dollar zarar ko‘rgan. Disney kinostudiyasining operatsion daromadi ko‘plab yangi filmlar namoyishi 2021 yilga ko‘chirilgani sababli 61 foizga kamayib, 419 mln dollarni tashkil qilgan.