20:34 / 17.12.2020
2664
Ўзбекистонда диализ хизматларини кўрсатиш лойиҳаси ишга туширилди

«Ўзбекистонда юқори сифатли диализ хизматларини кўрсатиш» ДХШ лойиҳаси учун Ҳиндистоннинг «NephroPlus» компанияси тендер асосида танлаб олинди.

Фото: Молия вазирлиги ахборот хизмати

17 декабр куни Молия вазирлигида юқори сифатли диализ хизматларини кўрсатиш учун хусусий шерикни танлаш бўйича халқаро тендер ғолиби эълон қилинди.

Тендерга учта йирик диализ компанияларидан таклифлар тушган. Энг яхши молиявий таклифни киритган Ҳиндистоннинг «NephroPlus» компанияси ғолиб деб топилди.

Эндиликда ушбу компания Ўзбекистонда биринчи марта перитонеал диализни уйда даволаш амалиётини жорий этади.

Гемодиализ бўйича давлат-хусусий шериклик (ДХШ) лойиҳаси доирасида мингдан ортиқ беморларга диализ хизматларини кўрсатиш учун Тошкент шаҳри, Қорақалпоғистон Республикаси ва Хоразм вилоятида 4та диализ клиникаси фаолияти ташкил этилади.

«NephroPlus» билан ДХШ шартномаси 30 кун ичида имзоланади.

Тадбирда қатнашган молия вазири Тимур Ишметов соғлиқни сақлаш соҳасидаги ДХШнинг аҳамиятига тўхталди.

«Aҳолига ҳар қандай хизмат тури каби соғлиқни сақлашда сифатли ва етарли миқдорда хизматлар кўрсатиш учун бу соҳага ҳам хусусий секторнинг сармоясини жалб қилмасдан илож йўқ. Давлат ва хусусий сармоя ўртасидаги давлат хусусий шерикчилик механизми Ўзбекистонда ресурслар чеклаган шароитда жуда ҳам ўринли бўлди.

Бугун соғлиқни сақлаш соҳасига ҳам давлат шерикчилик механизми кириб келишининг биринчи қадами қўйилди. Бунинг энг муҳим томони шундаки, лойиҳада буюртмачи ҳам, бажарувчи ҳам бирдек манфаат кўради», – деди Ишметов.

Лойиҳани ишлаб чиқишда Молия ва Соғлиқни сақлаш вазирликларига Халқаро молия корпорацияси кўмак берди.

«Ушбу лойиҳа нафақат беморларнинг ҳаёт сифатини яхшилашга, балки кўплаб одамларнинг ҳаётини сақлаб қолишга, сурункали касалликларга чалинган беморларнинг сифатли даволанишига ёрдам беради», – деди ХМКнинг Европа ва Марказий Осиё бўйича директори Вибке Шлеммер.

Қайд этиш лозим, мазкур лойиҳа доирасида Ўзбекистон ва Марказий Осиёда биринчи марта давлат аризаларни қабул қилиш ва тендер ўтказиш учун электрон платформадан фойдаланди.

Маълумот учун, Молия вазирлиги ва Соғлиқни сақлаш вазирлиги иккита янги маслаҳат шартномасини тузган. Шартнома асосида, ХМК билан ҳамкорликда Ўзбекистоннинг учта минтақасида саратонга чалинган беморлар учун нурланиш терапиясини тақдим этадиган касалхонани молиялаштириш, қуриш, жиҳозлаш, тиббий ходимларни ишга қабул қилиш ва ўқитиш лойиҳаси амалга оширилади.

Top