Ayrim tadbirkorlar QQSni 3 oyda bir marta to‘lashi mumkin bo‘ladi - Moliya vaziri o‘rinbosari

Koronavirus pandemiyasi sharoitida O‘zbekiston Respublikasi Prezidentining 2020 yil 3 apreldagi PF-5978-sonli Farmoni bilan 2020 yil 1 apreldan 31 dekabrga qadar bo‘lgan davrda tovarlarni (xizmatlarni) realizatsiya qilish aylanmasi oyiga 1 mlrd. so‘mdan oshmaydigan va elektron hisob-fakturalarni qo‘llaydigan qo‘shilgan qiymat solig‘i to‘lovchilar ushbu soliqni har choraklik asosida hisoblash va to‘lash huquqiga ega ekanligi nazarda tutilgan.

Moliya vaziri o‘rinbosari Dilshod Sultonov ushbu normani kelgusida ham saqlab qolish va uni Soliq kodeksida doimiy ravishda nazarda tutish haqida gapirdi.

«Soliq to‘lovchilar chorakda bir marotaba hisobot topshirib, 3 oyda bir marta QQS to‘laydi. Bu yerda aylanma mablag‘i 1 milliard so‘mgacha bo‘lgan tadbirkorlar haqida gap ketyapti», — deya qayd etdi Sultonov.

Moliya vaziri o‘rinbosarining hisob-kitobiga ko‘ra, ayni paytda 10 mingga yaqin tadbirkorning aylanma mablag‘i 1 milliard so‘mgacha bo‘lib, aynan chorakda bir marta QQS to‘lash imkoniyati evaziga 220 milliard so‘m tadbirkorlar ixtiyorida qoladi.

Ma'lumot uchun, 2021 yilda bazaviy soliq stavkalarini o‘zgarishsiz saqlab qolish ko‘zda tutilgan. Jumladan, qo‘shilgan qiymat solig‘i 15 foiz, foyda solig‘i 15 foiz, jismoniy shaxslardan olinadigan daromad solig‘i 12 foiz, budjet tashkilotlaridan  ijtimoiy soliq 25 foiz, qolgan sub'yektlardan 12 foiz, mikrofirmalar va kichik korxonalar uchun aylanma solig‘i 4 foizlik stavkalar  saqlanib qolinmoqda.