12:29 / 19.12.2020
1705
«Норматив-ҳуқуқий ҳужжатлар тўғрисида»ги қонун маъқулланди

Сенатнинг ўнинчи ялпи мажлисида “Норматив-ҳуқуқий ҳужжатлар тўғрисида”ги янги таҳрирдаги Ўзбекистон Республикаси Қонуни муҳокама марказида бўлди.

Фото: Олий Мажлис Сенати ахборот хизмати

Таъкидланганидек, ушбу Қонун 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини тегишли Давлат дастурининг ижросини таъминлаш мақсадида ишлаб чиқилган.

Ўзбекистон Республикаси қонунчилик базасини тизимлаштириш, норматив-ҳуқуқий ҳужжатларни ишлаб чиқиш ва қабул қилиш жараёнлари сифатини ошириш, шунингдек, уларнинг ижроси мониторингини такомиллаштириш, норма ижодкорлиги жараёнига замонавий ахборот коммуникация технологияларини жорий этиш масалалари долзарб масала эканлиги қайд этилди.

Қонунчилик амалиётида норма ижодкорлиги фаолиятини тартибга солувчи қонун ҳужжатларининг тарқоқлиги ҳуқуқни қўллаш амалиётида турли муаммолар ва коллизияларни келтириб чиқараётган эди.

Янги таҳрирдаги “Норматив-ҳуқуқий ҳужжатлар тўғрисида”ги Қонунда амалдагидан фарқли ўлароқ бир қатор янгиликлар белгиланмоқда. Бунда:

  • қонунчилик ҳужжати лойиҳалари юзасидан ўтказиладиган экспертизалар, жумладан, коррупцияга қарши ва гендер тенгликни таъминлаш экспертизалари ҳамда уларни ўтказиш тартиби;
  • лойиҳаларни Ўзбекистон Республикаси Интерактив давлат хизматлари ягона порталида муҳокама қилинишининг ҳуқуқий механизми;
  • лойиҳа таъсирини баҳолаш институти киритилиши;
  • ҳуқуқий эксперимент ўтказиш тушунчаси ва уни ўтказиш тартиби;
  • қонун ҳужжатлари ва қонуности ҳужжатларига қўйиладиган асосий талаблар каби масалаларга алоҳида эътибор қаратилди.

Сенаторларнинг таъкидлашича, Қонун қабул қилиниши натижасида ҳуқуқий соҳадаги кенг кўламли ислоҳотлар амалга оширилаётган даврда норма ижодкорлиги фаолиятига тааллуқли бўлган барча ўзгартиришлар, шу жумладан, қонунларнинг тўғридан тўғри амал қилиш механизмини қонунчилик даражасида мустаҳкамлаш таъминланади.

Сенат аъзолари мазкур Қонунни маъқуллади.

Top