19:54 / 08.01.2021
31030
ССВ бепул санаторий-курорт йўлланмалари кимларга ва қай тартибда берилиши тўғрисида маълумот берди

Соғлиқни сақлаш вазирлиги ҳузуридаги Тиббий-ижтимоий хизматлар агентлиги директор ўринбосари вазифасини бажарувчи Баҳодир Каримов ССВ матбуот хизмати билан суҳбатда аҳолининг ижтимоий ҳимояга муҳтож қатламига вазирлик тасарруфида бўлган санаторий-курорт хизматидан бепул фойдаланиш учун йўлланмаларнинг берилиш тартиби тўғрисидаги саволларга жавоб берди.

— Ногиронлар ва кексаларни вазирлик тасарруфидаги санаторий-курорт йўлланмалари билан бепул таъминлаш туман ва шаҳар тиббий-ижтимоий хизматлар шуъбалари орқали амалга оширилади. Санаторий йўлланмалари ҳар йили навбат асосида қуйидаги шахсларга берилади:

  • уруш ногиронлари ва уларга тенглаштирилган шахслар;
  • республика аҳамиятига молик шахсий пенсия олувчилар; 
  • Чернобил АЭС ҳалокати оқибатида нурланиш касаллигига чалинган ва уни бошидан кечирган, шунингдек Чернобил ҳалокати сабабли ногирон бўлиб қолган шахслар; 
  • ядро полигонлари ва бошқа радиация-ядро объектларида ҳарбий хизматни ўтаганлар; 
  • шунингдек, ёлғиз кексаларга санаторий йўлланмалари берилади.

Икки йилда бир маротаба навбат асосида эса: 

  • уруш қатнашчиларига тенглаштирилган шахслар; 
  • ҳалок бўлган ҳарбий хизматчиларнинг оилалари; 
  • I ва II гуруҳ ногиронлиги бўлган шахслар, кўзи ожиз I гуруҳ ногиронини кузатиб борувчиларга берилади.

Шунингдек, санаторийларда бўш ўрин мавжуд бўлган тақдирда, навбат асосида, 3 йилда 1 марта ёшга доир пенсионерларга ҳам йўлланма берилиши мумкин.

— Ногиронлиги бўлган шахслар ва кексалар йўлланмаларни олиши учун қандай ҳужжатлар тақдим этиши зарур?

— Ногиронлиги бўлган шахслар ва кексалар йўлланмаларни олиши учун туман ёки шаҳар тиббий-ижтимоий хизматлар шуъбаларига қуйидаги ҳужжатларни тақдим этишлари лозим:

  • раҳбар номига ариза;
  • паспорт нусхаси;
  • имтиёздан фойдаланиш ҳуқуқини берувчи ҳужжат;
  • тиббий хулоса.

Аризалар махсус рўйхатга олиш китобида қайд этилади. Йўлланмалар ногиронлиги бўлган шахслар ва кексаларга унинг амал қилиш муддати бошланишидан камида 10 кун олдин тиббий хулосага мувофиқ берилади. 

Йўлланмалар фақат уларда кўрсатилган муддатларда ҳақиқий ҳисобланиб, кечикиб келинган кунлар тикланмайди. 

Шунингдек, йўлланмадан фақат унда кўрсатилган шахсгина фойдаланиши мумкин. Санаторийга битта йўлланма билан биттадан ортиқ киши қабул қилинмайди. 

Санаторийга ташриф буюрган ногиронлиги бўлган шахслар ва кексалар ўзи билан бирга йўлланмадан ташқари паспорт ва санаторий-курорт картасини олиб келиши лозим.

Top