«Bola a'lochi yoki ikkichi bo‘lib tug‘ilmaydi» - tadbirkor Shahnoza Muhamedova bilan suhbat

Kun.uz «Intellekt» ruknida muvaffaqiyatli faoliyati bilan jamiyatda o‘z o‘rnini topgan insonlar bilan suhbatlar tashkil etishda davom etadi. Navbatdagi suhbatdoshimiz – shaxsiy rivojlanishga doir «Biznes Rivoj» loyihasi asoschisi Shahnoza Muhamedova bo‘ldi.

Tadbirkor bir necha yillar oldin o‘zbek tilida motivatsion kitoblar, mediamahsulotlar va shaxsiy rivojlanishga oid kurslar juda kamligini payqaydi va shundan so‘ng o‘zi yoshlarga ana shunday foydali materiallarni taqdim etishga qaror qiladi.

«Barchasi insonning o‘z qo‘lida ekani, o‘z ustida ishlash, o‘ziga ishonish va ilm olish bilan maqsadlariga erisha olishini o‘zimda his qilganman. Ammo motivatsion maqolalar, videolar hammasi ingliz, rus tillarida edi.

O‘zbek tilida manbalar qidira boshladim, lekin aynan o‘z ustida ishlashga, marketing, menejment yo‘nalishlarida yaxshi nashrlar yo‘q edi. Til bilmagan yoshlarda ham bunday bilimlarni egallash imkoniyati bo‘lishi kerak, degan maqsadda biznes boshqaruvi, HR, marketing kabi yo‘nalishlardagi maqolalarni tarjima qila boshladik. Faoliyatimiz shu tarzda boshlangan», – deydi Shahnoza Muhamedova.

«9-sinfgacha yaxshi o‘qimaganman»

— Maktab paytida hech qachon MBA darajam bo‘ladi, deb o‘ylamaganman. Andijonda, o‘zbekcha oilada katta bo‘lganman. Avvaliga o‘qishga bo‘lgan qiziqishim yuqori emasdi, 8-sinfgacha ko‘proq uy ishlarida yordamlashishni yoqtirardim.

Kunlarning birida oyim so‘rab qolganlar: «Hayotda kim bo‘lmoqchisan?» Men uy bekasi bo‘lishni xohlashimni aytganman. Oyim esa biror kasbning zo‘r egasi bo‘lishimni istagan. Keyinroq dadam so‘raganida esa: «Men ham sizdek tadbirkor bo‘laman», deya javob berganman. Dadam: «Buning uchun hozirgi bilimlaring yetadi, deb o‘ylaysanmi?» deya so‘raganlar.

Shundan keyin o‘qiyman deb jiddiy ahd qilganman. 9-sinfga o‘tish arafasida avvalgi yillardagi darsliklarni takroran o‘rganib chiqqanman, 9-sinfning 1-choragiga kelib a'lochiga aylanganman. Men bungacha inson a'lochi yoki ikkichi bo‘lib tug‘iladi, deb o‘ylagan ekanman.

Tushunganmanki, bola necha bahoga o‘qishi ota-ona va o‘qituvchilarning unga qanday munosabatda bo‘lishiga bog‘liq. Bizda esa afsuski maktablarda o‘qituvchilarning o‘quvchini ruhlantirish o‘rniga doim tanqid qilishi odatiy hol.

Amerikada yashab qolish niyati bilan borgan talaba nega ortga qaytgan?

— Biznes boshqaruvi yo‘nalishida AQShning Linkoln universitetida magistratura bosqichida o‘qiganman. Amerikada turmush o‘rtog‘im bilan birga yashadik, amerikacha hayot tarzi bilan tanishdik. U yerda ko‘p narsa o‘rganganman.

Amerikada qolish niyati bilan ketgandik. Lekin biror kompaniyada oddiy ishchi emas, o‘zim muvaffaqiyatli kompaniya asoschisi bo‘lgim kelgan. AQShda esa raqobat juda kuchli. U yerda ko‘p bozorlar egallab bo‘lingan, bizda esa bozorimizga kirib kelmagan mahsulot va xizmatlar turlari juda ko‘p.

O‘zbekistonda sifatli mahsulot yarata olaman, o‘z kompaniyamni muvaffaqiyatli yurita olaman degan ishonch bo‘lgan. Biznes bilan shug‘ullanishni niyat qilganman-u, lekin qaytmasimdan oldin bu hali aynan qaysi yo‘nalishda bo‘lishini bilmaganman. Qaytib kelgach esa ta'lim yo‘nalishini tanlaganman.

To‘liq suhbatni yuqoridagi video orqali tomosha qilishingiz mumkin.

Nafosat Tojiboyeva suhbatlashdi.
Tasvirchi – Muhammadjon G‘aniyev.