Kasb-hunarga o‘rgangan ishsiz yoshlarning o‘qish xarajatlari davlat tomonidan qoplab beriladi

Yoshlarni tadbirkorlikka yo‘naltirish va ularning biznes loyihalarini qo‘llab-quvvatlash maqsadida Savdo-sanoat palatasi va hamkor tashkilotlar tomonidan yoshlarga tadbirkorlik haqida nazariy bilimlar berilishi ma'lum qilindi. «Yoshlar 1+1» dasturi asosida 6 kun, ya'ni 48 soat davomida maxsus kurslar tashkil etilib, kurs tinglovchilariga maxsus sertifikatlar berilishi rejalashtirilmoqda. Kurslarni tugatgan ishsiz yoshlar 3 yil muddatga 33 million so‘mgacha bo‘lgan 6 oylik  imtiyozli davri va garovsiz kredit olish imkoniyatiga ega bo‘ladi, deb xabar bermoqda Kun.uz muxbiri.

Ta'kidlanishicha, hududlarda «Har bir tadbirkor – yoshlarga madadkor» tamoyili asosida yoshlarni tadbirkorlikka keng jalb etish va ularning bandligini ta'minlash maqsadida namunaviy o‘qishlar tashkil etilmoqda.

Ma'lum qilinishicha, Tadbirkorlikni rivojlantirish agentligi hamda Biznes va tadbirkorlik oliy maktabi tomonidan ma'qullangan dasturlar va belgilangan talablar asosida tashkil etilgan o‘quv kurslarini tamomlagan har bir bitiruvchi uchun kasb-hunar va tadbirkorlikka o‘qitish bo‘yicha nodavlat ta'lim muassasalariga sarflangan xarajatning 70 foizi, biroq har bir bitiruvchiga 1 million so‘mdan ortiq bo‘lmagan miqdori davlat tomonidan kompensatsiya qilinadi.

Ushbu kurslarni muvaffaqiyatli tamomlab, sertifikat olgan bitiruvchilarga o‘z biznesini tashkil etish uchun mikrokredit ajratiladi. 

Mikrofirma va kichik korxona tashkil etgan shaxslarga uchinchi shaxs kafilligi va sug‘urta polislarisiz 225 million so‘mgacha kredit Tadbirkorlik faoliyatini qo‘llab-quvvatlash jamg‘armasining kafilligi asosida beriladi.

Avvalroq, yoshlar tadbirkorligi va bandligini ta'minlash uchun 100 million dollar, shuningdek, yoshlarning biznes loyihalarini kreditlash hamda ularni kasb-hunarga o‘qitish uchun 1 trillion so‘m va 50 million dollar ajratilishi ma'lum qilingandi.