Urgutdagi poyabzal ishlab chiqaruvchi oilaviy korxonada yirik yong‘in sodir bo‘ldi

Bugun, 11 yanvar kuni, soat 11:24larda Samarqand viloyati Urgut tumani “Mergancha” MFYda joylashgan “Toyibaxon Nur" poyabzal ishlab chiqaruvchi oilaviy korxonasida yong‘in sodir bo‘lgan.

Foto: FVV matbuot xizmati

Favqulodda vaziyatlar vazirligi tomonidan e'lon qilingan ma'lumotda aytilishicha, yong‘in oqibatida binoning taxminan 250 kvadrat metr maydoniga zarar yetgan.

Mazkur holat yuzasidan viloyat Favqulodda vaziyatlar boshqarmasining 4ta yong‘in-qutqaruv ekipaji voqea joyiga yetib borgan. Qutqaruvchilarning olib borgan sa'y-harakatlari natijasida yong‘in soat 11:40da o‘rab olinib, 13:35da to‘liq bartaraf etilgan. Shuningdek, yong‘indan korxonaning 150 kvadrat metr maydoni saqlab qolingan.

Ushbu holatdan jabrlangan va halok bo‘lganlar yo‘q. Hodisaning kelib chiqish sababi va zarari aniqlanmoqda, deyiladi xabarda.