Saudiya Arabistoni kompaniyasi O‘zbekistondan meva-sabzavot mahsulotlarini eksport qiladi

O‘zbekistonning Saudiya Arabistonidagi elchisi Ulug‘bek Maqsudov mazkur mamlakatning meva-sabzavotlar importiga ixtisoslashgan «Fruit Tree» kompaniyasi direktori Adham at-Turkistoniy bilan uchrashuv o‘tkazdi.

«Dunyo» agentligi xabariga ko‘ra, uchrashuvda Saudiya Arabistoniga O‘zbekistonda yetishtirilgan qishloq xo‘jaligi mahsulotlari hamda o‘zbek milliy atlas va adras matolari eksportini amalga oshirish bo‘yicha hamkorlik istiqbollari muhokama qilingan.

«Fruit Tree» kompaniyasi rahbari Farg‘ona viloyatidagi «Xayrotul Vodiy» shirkati bilan hamkorlikda qiymati 500 ming dollarga teng eksport shartnomasini imzolash istagini tasdiqladi. O‘z navbatida, kompaniya O‘zbekistonga xurmo eksportini yo‘lga qo‘yishni rejalashtirmoqda.

Bundan tashqari, ma'lum qilinishicha, kompaniya Saudiya Arabistonidagi eng yirik meva sharbatlari ishlab chiqaruvchi «Sharbatly fruit Co. Ltd» kompaniyasi uchun O‘zbekistondan mavsumiy ho‘l mevalar: qulupnay, shaftoli, anor, o‘rik, olxo‘ri, nok, olcha, behi va olma mevalarini yetkazib berish bo‘yicha muzokaralar o‘tkazmoqda.