Agrosanoat majmuiga kiruvchi ilmiy-tadqiqot muassasalari budjetdan moliyalashtirishga o‘tkaziladi

Vazirlar Mahkamasining “Agrosanoat majmui tarkibiga kiruvchi ilmiy-tadqiqot muassasalarini 2021 yilda O‘zbekiston Respublikasi davlat budjeti hisobidan moliyalashtirishga o‘tkazish chora-tadbirlari to‘g‘risida”gi qarori loyihasi e'lon qilindi.

Prezidentning “Qishloq xo‘jaligida bilim va innovatsiyalar tizimi hamda zamonaviy xizmatlar ko‘rsatishni yanada rivojlantirish to‘g‘risida” PF–6159-son farmoni 10-bandi va 4-ilova hamda prezidentning “O‘zbekiston Respublikasi Qishloq xo‘jaligi vazirligi huzuridagi qishloq xo‘jaligida bilim va innovatsiyalar milliy markazi faoliyatini tashkil etish to‘g‘risida”gi PQ–4975-son qarori 11-bandiga asosan, joriy yil 1 fevraldan boshlab ilmiy-tadqiqot institutlari hamda ular tizimiga kiruvchi ilmiy-tajriba stansiyalari bino va inshootlarini saqlash, shuningdek, ularning xodimlari (ilmiy xodimlardan tashqari) mehnatiga haq to‘lash bo‘yicha xarajatlarni moliyalashtirish davlat budjeti mablag‘lari hisobidan amalga oshirilishi ko‘zda tutilgan.

Qaror loyihasini ishlab chiqish va qabul qilish zarurati quyidagilar bilan asoslangan:

agrosanoat majmuiga kiruvchi muassasalar idoraviy boshqaruv jihatidan turli vazirlik va idoralar bo‘ysunuvida bo‘lib, ularni Budjet kodeksi talablaridan kelib chiqib davlat budjeti hisobidan moliyalashtirishga o‘tkazish yuzasidan zarur chora-tadbirlar amalga oshirilishi talab etiladi. Ushbu ilmiy muassasalarning faqat 5tasida prezident va hukumatning tegishli qarorlari bilan tasdiqlangan tuzilmasi mavjud.

Qaror loyihasi bilan Qishloq xo‘jaligi vazirligi tizimidagi Paxta seleksiyasi, urug‘chiligi va yetishtirish agrotexnologiyalari ilmiy-tadqiqot instituti, Qoraqalpog‘iston Dehqonchilik ilmiy-tadqiqot instituti, Sabzavot, poliz ekinlari va kartoshkachilik ilmiy-tadqiqot instituti, Qishloq xo‘jaligi va oziq-ovqat sohasi iqtisodiyoti ilmiy-tadqiqot instituti, O‘simliklarni himoya qilish ilmiy-tadqiqot instituti, O‘simliklar genetik resurslar ilmiy-tadqiqot instituti, Don va dukkakli ekinlar ilmiy-tadqiqot instituti, Sholichilik ilmiy-tadqiqot instituti, Lalmikor dehqonchilik ilmiy-tadqiqot instituti, Janubiy dehqonchilik ilmiy-tadqiqot instituti, Tuproqshunoslik va agrokimyo ilmiy-tadqiqot instituti, Moyli va tolali ilmiy-tajriba stansiyasi, Ozuqa ekinlar ilmiy-tajriba stansiyasi, Respublika qishloq xo‘jaligi ilmiy kutubxonasi, Suv xo‘jaligi vazirligi tizimidagi Irrigatsiya va suv muammolari ilmiy-tadqiqot instituti tuzilmalari hamda xodimlarning umumiy cheklangan soni tasdiqlanadi.

Qarorda nazarda tutilgan xarajatlarni moliyalashtirish 2021 yilda respublika budjetidan birinchi darajali budjet mablag‘larini taqsimlovchi sifatida Qishloq xo‘jaligi vazirligiga ajratiladigan mablag‘lar doirasida, 2022 yildan boshlab esa davlat budjeti parametrlarida nazarda tutilishi belgilab qo‘yiladi.

Mazkur qaror loyihasi bilan respublika agrosanoat majmui tarkibiga kiruvchi ilmiy-tadqiqot muassasalarida:

• bino va inshootlarni saqlash, shuningdek, xodimlar (ilmiy xodimlardan tashqari) mehnatiga haq to‘lash bo‘yicha xarajatlarni moliyalashtirish davlat budjeti mablag‘lari hisobidan moliyalashtirish asosida amalga oshiriladi;
• rahbar xodimlar ish haqi budjet mablag‘lari hisobiga fundamental, amaliy tadqiqotlar va innovatsion ishlar ilmiy-texnika dasturlarini amalga oshirishda qatnashuvchi ilmiy-tadqiqot muassasalari rahbar xodimlarining bazaviy lavozim maoshlarini to‘lashga qonuniy asos yaratiladi.