17:02 / 11.03.2021
5235
Самарқандда жиноят содир этиши ва унинг қурбони бўлиши эҳтимоли туфайли 70 мингдан ошиқ шахс махсус рўйхатга олинган

Самарқанд вилоятида 2020 йил давомида жиноят содир этиши ва унинг қурбони бўлиши эҳтимоли юқори бўлган 70 минг 151 нафар шахс махсус рўйхатга олинган. Бу ҳақда бугун 11 март куни вилоят ҳудудида содир этилаётган жиноят ва ҳуқуқбузарликларнинг аҳволи ҳамда уларнинг олдини олиш профилактикаси борасида амалга оширилаётган ишларга бағишланган матбуот анжуманида маълум қилинди.

Самарқанд вилоят ИИБ бошлиғи ўринбосари Акром Ҳалимовнинг маълум қилишича, 2020 йил давомида жиноятчиликнинг олдини олиш мақсадида бир қатор профилактик тадбирлар ўтказилган.

Жумладан, содир этилган жиноятлар таҳлилидан келиб чиққан ҳолда ҳамкор ташкилотлар томонидан «Хавфсиз маҳалла» концепцияси тизими фаолиятини ташкил этиш ва мувофиқлаштириш мақсадида ҳуқуқбузарлик ва жиноятларнинг олдини олиш профилактикаси бўйича Маҳалла ва оилани қўллаб-қувватлаш бошқармаси билан ҳамкорликда «Жиноят содир этиши эҳтимоли мавжуд ҳамда жиноят қурбони бўлиши эҳтимоли юқори бўлган шахслар билан ҳамкорликда олиб борилиши лозим бўлган профилактик тадбирларни ташкил этиш» ҳақидаги қўшма қарори ишлаб чиқилган.

Қайд этилишича, мазкур қўшма қарорга асосан ҳудудий ички ишлар ҳамда маҳалла ва оилани қўллаб-қувватлаш бўлимлари ҳамкорликда Самарқанд вилоятидаги 1 100 та маҳаллада яшовчи 3 миллион 928 минг нафар шахс орасидан жиноят содир этиши ва жиноят қурбони бўлиши эҳтимоли юқори бўлган 70 минг 151 нафар шахснинг махсус рўйхати шакллантирилган. Мазкур шахслар 44 та тоифага ажратилиб, улар билан профилактик тадбирлар ўтказилган.

Шунингдек, вилоят ҳудудида яшовчи жиноят содир этиши эҳтимоли юқори бўлган шахслар билан тезкор-профилактик тадбирларни янада кучайтириш мақсадида:

  • «Тафтиш» тадбири (10.08.2020 кундаги 47-сонли фармойиши асосида);
  • 20 сентябр кунидан 20 октябр кунига қадар «Тазйиқ ва зўравонликка қарши курашиш ойлиги» махсус профилактик тадбири (19.09.2020 йил №4/3ҚФ-сонли Қўшма фармойишга асосида);
  • 20 август кунидан 20 сентябр кунига қадар «Ичкиликбозликка қарши курашиш ойлиги» махсус профилактик тадбирлари (19.08.2020 йилдаги 41-сонли фармойиш асосида) ўтказилган.

Бундан ташқари, «Турмуш» ва «Тозалаш-Антитеррор», «Назорат«, «Тиғ» ва «Давомат» тадбирлари ўтказилган.

Таъкидланишича, мазкур йўналишлардаги олиб борилган профилактик тадбирлар 2021 йилда ҳам давом эттирилмоқда.

Маълумот учун, 2020 йилда ҳар бир маҳаллада профилактика инспекторлари лавозими жорий этилиб, вилоят ИИБ сафида хизмат қилаётган участка инспекторлари сони 1 096 нафарга етказилган.

Top