21:36 / 19.03.2021
11013
АҚШ элчиси Туркия С-400 тизимларидан воз кечиши шартлигини айтди

Дэвид Саттерфилднинг сўзларига кўра, бу "унинг шахсий қараши эмас, балки Америка қонунчилигига мос келадиган талабдир".

Фото: ТАСС

Туркия Россиянинг С-400 зенит-ракета тизимларидан воз кечиши Қўшма Штатлар билан бу мавзудаги келишмовчиликларни ҳал қилишнинг ягона йўли ҳисобланади. Бу ҳақда АҚШнинг Туркиядаги элчиси Дэвид Саттерфилд айтди.

"Туркия С-400дан воз кечиши шарт. Бу биз АҚШ конгрессида ҳимоя қиладиган ягона қарор", - дея унинг сўзларидан иқтибос келтирмоқда Bir Gun нашри.

Саттерфилднинг сўзларига кўра, бу "унинг шахсий қараши эмас, балки Америка қонунчилигига мос келадиган талабдир".

Март бошларида Туркия мудофаа саноати бошқармаси бошлиғи Исмоил Демир Анқара Россиядан С-400 тизимининг иккинчи полкини сотиб олиш имкониятини кўриб чиқаётганини айтганди.

Россия ва Туркия 2017 йилда Анқарага С-400 тизимларини етказиб бериш бўйича шартнома тузганди. Туркиянинг Россия зенит-ракета тизимларини сотиб олиши АҚШ ва альянснинг кескин норозиликларига сабаб бўлди. Вашингтон Анқарани бешинчи авлод F-35 қирувчи самолётларини ишлаб чиқариш дастуридан чиқариб ташлади.

Top