Yaponiya O‘zbekistonga 136,5 million dollar miqdorida favqulodda kredit ajratdi

Koronavirusning salbiy oqibatlarini bartaraf etish uchun O‘zbekiston Yaponiyadan 136,5 million dollar miqdorida favqulodda kredit oldi.

 26 mart kuni Yaponiyaning O‘zbekistondagi elchisi Yoshinori Fujiyama va O‘zbekiston moliya vazirining o‘rinbosari Odilbek Isoqov umumiy qiymati 15 milliard iyenani (136,5 million dollar) tashkil qiluvchi shartnoma imzoladi, deb xabar bermoqda «Dunyo».

Kredit 0,01 foiz stavkasida 4 yillik imtiyozli davr bilan 15 yillik muddatga berilgan. Ta'kidlanishicha, ushbu mablag‘ O‘zbekistonni COVID-19 inqiroziga qarshi moliyaviy qo‘llab-quvvatlash uchun taqdim etilgan.

 “Favqulodda kreditning maqsadi koronavirus tarqalishi sababli jiddiy zarar ko‘rgan O‘zbekistonning ijtimoiy-iqtisodiy barqarorligi va rivojlanishiga hissa qo‘shishdan iborat”, deyiladi xabarda.

Avvalroq O‘zbekiston Yaponiya Xalqaro hamkorlik agentligi (JICA)dan 15 milliard iyena va 195 million dollar miqdorida qarz olmoqchi ekanligi ma'lum qilingandi. Ajratiladigan qarz mablag‘lari O‘zbekiston budjeti xarajatlarini moliyalashtirish uchun yo‘naltirilishi aytilgandi.