23:39 / 27.04.2021
13528
Ҳарбийлар Макронни Франция барбод бўлиши мумкинлигидан огоҳлантиришди 

Истеъфодаги ва захирадаги юзлаб француз генераллари ва зобитлари Франция президенти Эммануэл Макронга йўллаган жамоавий мактубларида, уни Франциянинг барбод бўлиши эҳтимоли юқори эканидан огоҳлантиришди. 

Фото: Stephane Mahe/Reuters

Valeurs actuelles нашрининг хабар беришича, улар Макрон эътиборини фанатиклар, ирқий урушлар тарафдорлари ва радикал «исломчилар» томонидан катта хавф тарқалаётганига қаратишган. Ҳарбийларнинг таъкидлашича, бундай кимсалар Франциянинг чекка ҳудудларини зимдан эгаллаб, у ерларда Франция конституциясига зид тартиб-қоидаларни ўрнатишмоқда. 

 «Бу мамлакатда ишидан чиққан ўқитувчи бошидан жудо қилиниши мумкинлигини ўн йил аввал ким ўйлабди дерсиз?» деб савол билан юзланган мактуб муаллифларидан бири.

 «Шуни эсда тутингки, биз каби ҳамюртларимизнинг аксарияти сизнинг қатъиятсизлигингиз ва сукут сақлашингиздан ҳайратда», деб таъкидлаб ўтган мактуб муаллифлари.

 Улар Макрон бунга қарши чора кўрмаса, мамлакатда давлат тўнтаруви амалга оширилиши ва ҳарбий хунта режими ўрнатилиши мумкинлигидан огоҳлантиришган.

«Кўраётганимиздек, сусткашликнинг мавриди эмас, йўқса эртага фуқаролик уруши тобора ошиб бораётган алғов-далғовликка чек қўяди ва ўлимлар сони минглабни ташкил қилади. Улар учун сиз жавобгар бўласиз», деб ўз сўзларини якунлаган собиқ ҳарбийлар.

 2020 йил 6 октябрда Париж яқинида Самуэль Пати исмли ўқитувчи бошидан жудо қилинганди. Уни ўз дарсида ислом динига оид карикатураларни намойиш қилгани учун чечен миллатига мансуб Абдулла Анзоров ўлдирганди. Шундан кейин Макрон радикал «исломчилар»га қарши кескин чоралар кўришга ваъда берганди.

2021 йил 23 апрелда эса Париж яқинидаги Рамбуйе шаҳрида тунислик эркак аёл полициячига пичоқ билан ҳужум қилди. Полициячи бўйнига пичоқ билан берилган бир нечта зарба оқибатида ҳалок бўлди. Эркакнинг ўзи ҳам қўлга олиниши вақтида олинган жароҳатлардан вафот этган. Аниқланишича, у Францияга 2009 йилда Тунисдан келган бўлган.

Top