23:37 / 22.05.2021
9924
Литва Хитойнинг 17+1 блокини тарк этди ва ЕИнинг бошқа мамлакатларини ҳам шундай қилишга чақирди

Ҳозирда ЕИнинг 11 мамлакати: Болгария, Хорватия, Чехия, Эстония, Греция, Венгрия, Латвия, Польша, Руминия, Словакия ва Словения ушбу блок аъзоси ҳисобланади.

Фото: Bloomberg

Литва Хитой ҳамда Шарқий ва Марказий Европа мамлакатларининг 17+1 шаклидаги блокидан чиқиб кетди. Бу ҳақда Литва ташқи ишлар вазири Габриэлиус Ландсбергис маълум қилди, деб хабар бермоқда Politico.

«Бундан буён 17+1 деган тушунча мавжуд эмас, чунки Литва унда йўқ», — деди Ландсбергис.

Вазир шунингдек, Евроиттифоқнинг бошқа мамлакатларини ҳам Хитой ташаббусидан воз кечишга чақирди.

«Бизнинг нуқтайи назаримизга кўра, Евроиттифоқнинг бўлиб ташловчи 16+1 шаклидан бирлаштирувчи ва самаралироқ бўлган 27+1 шаклига ўтиш вақти келди.  ЕИ барча 27 аъзо давлат биргаликда ҳаракат қилганида энг кучли ҳисобланади», — дея қўшимча қилди Ландсбергис.

Ҳозирда мазкур шаклда ЕИнинг яна 11 мамлакати: Болгария, Хорватия, Чехия, Эстония, Греция, Венгрия, Латвия, Польша, Руминия, Словакия ва Словения қолди. Хитой Албания, Босния ва Ҳерцеговина, Шимолий Македония, Черногория ва Сербияни ушбу ташаббусга қўшилишга ундамоқда.

Ушбу шакл иқтисодиёт, савдо, фан ва таълим соҳаларидаги ўзаро ҳамкорлик масалаларини қамраб олади. Аъзо мамлакатларнинг биринчи саммити 2012 йилда Варшавада ўтказилган.

Top