O‘zbekistonlik taekvondochilar ilk bor to‘liq tarkibda Olimpiya o‘yinlarida qatnashadi

Iordaniyaning Ammon shahrida taekvondo bo‘yicha Tokio-2020 Olimpiya o‘yinlariga yo‘llanma beruvchi lisenzion turnir yakuniga yetib bormoqda. 21 may kungi bahslarda Nigora Tursunqulova va Ulug‘bek Rashitov Tokio-2020 litsenziyasiga ega chiqqan bo‘lsa, 22 may kuni o‘tkazilgan yuqori vaznli taekvondochilar bahslarida Svetlana Osipova olimpiada litsenziyasini qo‘lga kiritdi. 

Ma'lumot uchun, Nigora Tursunqulova faoliyatida ikkinchi bor Olimpiya o‘yinlariga yo‘llanmani qo‘lga kiritmoqda. U 17 yoshida Rio-2016 olimpiadasida ishtirok etgan edi. 

2018 yilgi o‘smirlar Olimpiadasi sovrindori Ulug‘bek Rashitov Olimpiada yo‘lida dastlab Mo‘g‘uliston, so‘ng Vetnam va Qozog‘iston terma jamoasi vakillarini mag‘lubiyatga uchratishga muvaffaq bo‘ldi.

+67 kg vazn toifasida 4 nafar sportchi ro‘yxatdan o‘tgan. Lisenziyalar finalchilarga taqdim etilishi bois yarim finaldagi g‘alaba ahamiyatli bo‘ldi. Ushbu bosqichda qatnashgan Svetlana Osipova filippinlik Kirsti Aloraga qarshi bahs olib bordi. Butun bellashuvda ustunlik qilgan Osipova 27:5 hisobida g‘alaba qozondi va Tokio-2020 Olimpiadasi ishtirokchisiga aylandi.

Yana bir ishtirokchi Nikita Rafalovich esa Xalqaro taekvondo federatsiyasi (WT)ning 2020 yil 1 yanvarda e'lon qilgan reytingiga ko‘ra olimpiada litsenziyasiga ega bo‘lgandi.

Shu tariqa taekvondo bo‘yicha O‘zbekiston terma jamoasi Tokio-2020 Olimpiya o‘yinlariga 4 ta yo‘llanmani qo‘lga kiritdi, natijada o‘z tarixida ilk bor to‘liq tarkib bilan Olimpiadada qatnashadigan bo‘ldi.

Tokio-2020 Olimpiya o‘yinlariga yo‘l olgan o‘zbekistonlik taekvondochilarning to‘liq tarkibi:

-68 kg: Ulug‘bek Rashitov

-80 kg: Nikita Rafalovich

-67 kg: Nigora Tursunqulova

+67 kg: Svetlana Osipova