Samarqandda «Kamaz-35320» va Isuzu yuk mashinalari to‘qnashdi

Samarqand viloyati Bulung‘ur tumanida Kamaz yuk mashinasi o‘zidan oldinda harakatlanib ketayotgan Isuzu yuk mashinasi bilan to‘qnashgan. Bu haqda viloyat IIB YHXB xabar bermoqda.

Ma'lum qilinishicha, bugun, 29 may kuni M39 Almati-Toshkent-Termiz xalqaro avtomobil yo‘lining Bulung‘ur tumani hududidan o‘tuvchi 1060-kilometrida, Toshkent-Samarqand yo‘nalishida harakatlanib kelayotgan «Kamaz-35320» yuk mashinasi o‘zidan oldinda harakatlanayotgan Isuzu yuk mashinasining orqa tomoniga kelib urilgan. Oqibatda, har ikkala mashina shikastlangan.

Qayd etilishicha, mazkur yo‘l-transport hodisasida hech kim tan jarohati olmagan. Aniqlanishicha, «Kamaz-35320» haydovchisi mashinani boshqarib kelayotganda charchoq tufayli uxlab qolgan va boshqaruvni yo‘qotgan.

Eslatib o‘tamiz, bugun tongda M41 Samarqand-Buxoro-Turkmanboshi xalqaro avtomobil yo‘lining Samarqand shahridan o‘tgan qismida Isuzu yuk mashinasining haydovchisi ham charchoq tufayli uxlab qolgan. Oqibatda mashina Zarafshon daryosining qirg‘og‘iga ag‘darilib ketgan.