09:10 / 18.06.2021
18794
Шимолий Корея 16 йил ичида илк бор бошқа давлатга хайрия маблағи ажратди
Фото: Reuters

Дунёнинг энг ночор давлатларидан бири Шимолий Корея БМТнинг Мьянмага инсонпарварлик ёрдами кўрсатиш бўйича ташаббусига 300 минг доллар ажратди.

БМТнинг инсонпарварлик фаолиятини мувофиқлаштириш бошқармаси маълумотларига кўра, Пхеньян Мьянмани коронавирусга қарши курашда қўллаб-қувватлаш, унга озиқ-овқат ва инсонпарварлик ёрдами кўрсатиш лойиҳасига маблағ ажратган.  

Маълумотларга кўра, Шимолий Корея охирги марта БМТ раҳбарлигидаги ёрдам лойиҳасига 2005 йилда хайрия маблағи ажратган.

Таъкидлаш жоиз, Шимолий Корея ва Мьянма дўстона муносабатларни қўллаб-қувватлаб келади.

Шимолий Корея 1 февралда амалга оширилган ҳарбий тўнтарувдан кейин оғир вазиятда қолаётган Мьянмага кўмак кўрсатиш лойиҳасида иштирок этаётган 10дан кўпроқ давлат орасига киради. Жумладан, шундай давлатлардан бири Жанубий Корея ушбу лойиҳа доирасида Мьянмага 600 минг доллар ажратган. Мьянмага энг катта хайрия маблағини эса АҚШ йўналтирган ва унинг қиймати 23 млн доллардан зиёдни ташкил қилган.

Ўзи ҳам иқтисодий ночор аҳволда бўлган Шимолий Корея камдан кам ҳолатларда хайрия амалга оширади. Аввалроқ мамлакат етакчиси Ким Чен Ин Шимолий Кореяда озиқ-овқат билан боғлиқ вазият ўта оғирлигини маълум қилган.

Top