Islomobodning ogohlantirishidan so‘ng Afg‘oniston Pokiston bilan chegaradagi operatsiyani to‘xtatdi - OAV

Afg‘oniston harbiy-havo kuchlari Islomobodning ogohlantirishidan so‘ng Pokiston bilan chegaradagi Spin-Boldak aholi maskanini “Tolibon” jangarilaridan ozod qilish bo‘yicha operatsiyani to‘xtatdi. Bu haqda TOLO News telekanali xabar bermoqda.

Operatsiya Pokiston harbiy-havo kuchlarining to‘qnashuvlarga aralashishi ehtimoli sababli to‘xtatilgan.

Afg‘oniston vitse-prezidenti Amrulla Solihning so‘zlariga ko‘ra, Islomobod Kobulni agar afg‘on kuchlari toliblarni “Spin-Boldak” nazorat-o‘tkazish punktidan siqib chiqarishga urinadigan bo‘lsa harbiy aviatsiyani ishga solishi mumkinligi haqida ogohlantirgan.

O‘z navbatida Pokiston bu xabarni rad etdi.

“Afg‘oniston vitse-prezidentining so‘zlariga qarshi o‘laroq, Pokiston HHK Afg‘oniston HHKga hech qanday ogohlantirish bermagan”, — deyiladi Pokiston tashqi ishlar vazirligining Facebook sahifasidagi xabarda.

14 iyul kuni “Tolibon” harakati Pokiston bilan chegaradagi “Spin-Boldak — Chaman” o‘tkazish punktini egallab olgani xabar qilingandi.