Avstraliyalik 2004 yilgi Olimpiada sovrindori 25 yilga qamaldi

Afinada bo‘lib o‘tgan 2004 yilgi Olimpiadada ikkita kumush medalni qo‘lga kiritgan avstraliyalik baydarkachi Natan Baggali 2018 yilda mamlakatga 650 kilogramm giyohvandlik moddasini olib kirishga uringani uchun 25 yilga ozodlikdan mahrum etildi.

7News telekanalining xabar berishicha, sportchining akasi Dryu Baggali 28 yilga qamalgan. U yana bir kishi bilan qayiqda kokain ortilgan kemadan giyohvandlik moddasini olgan. Ammo ularni Avstraliya harbiy-dengiz kuchlarining patrul kemasi ta'qib qilganidan so‘ng ular kokainli paketlarni suvga uloqtirgan. Paketlarda 650 kilogramm kokain bo‘lgan.

Tergov Natan Baggali ushbu jinoyatga sherik bo‘lgan deb topdi. 

Avstraliyalik sportchi 2005 yilda doping qabul qilganligi aniqlanganidan so‘ng sportni tark etgandi. O‘shandan buyon u bir necha marta giyohvand moddalar bilan bog‘liq ishlarga aralashgan. Jumladan, 2009 yilda akasi bilan ekstazi ishlab chiqarish va sotishda ayblanib qamalgan. 2015 yilda ham giyohvand moddalar savdosida ayblangan.